Trajneri i Atletico Madridit, Diego Simeone, pranon se e sheh veten “një ditë si trajner i Interit” dhe mendon se skuadra e Cristian Chivu janë “favoritë për Scudetto” para ndeshjes së tyre në Ligën e Kampionëve.

Ndeshja zhvillohet në “Metropolitano” të mërkurën nga ora 21:00.

Ndërsa “Nerazzurri” kanë rekord 100 për qind këtë sezon në Ligën e Kampionëve me 12 pikë nga 4 ndeshje, Atletico ka pasur vështirësi dhe ka siguruar vetëm gjysmën e atij rezultati.

Ka pasur disa momente pozitive, si fitorja 5-1 ndaj Eintracht Frankfurt dhe 3-1 ndaj Union Saint-Gilloise, por edhe humbje, si 3-2 ndaj Liverpool dhe humbja e turpshme 4-0 në fushën e Arsenalit.

Kjo do të thotë se Atletico duhet të përpiqet të ruajë avantazhin e fushës kur Inter vjen në Madrid.

Simeone në konferencën për shtyp tha: “Inter luan shumë mirë, ka karakter dhe një model sulmues shumë të qartë. Kanë një skuadër të jashtëzakonshme. Ata dominuan të gjithë ndeshjen ndaj Milan, patën raste për të shënuar dhe mund të fitonin. Sigurisht, luajtën për të fituar. Në Champions League, numrat e tyre flasin vetë”.

Humbja 1-0 ndaj AC Milanit fundjavën e kaluar në “Derby della Madonnina” konfirmoi një tendencë këtë sezon ku Inter ka pasur vështirësi në ndeshjet e mëdha.

Simeone vazhdoi: “Për një skuadër si Interi, humbja e derbit do të thotë ta lësh pas menjëherë dhe të vazhdojnë, sepse kjo është një skuadër shumë e fortë, favoritet për të fituar Scudetto dhe do të shkojnë larg edhe në Champions League. Çdo ndeshje është e rëndësishme për ne, pavarësisht kundërshtarit. Jemi në fazën ngritëse të sezonit. Duhet të përmirësohemi në disa fusha, por jemi të vetëdijshëm për këtë dhe po punojmë”.

Ai shtoi: “Tifozët tanë mund të na ndihmojnë nesër, janë vendimtarë për ndeshjet në shtëpi me mbështetje dhe pasion të jashtëzakonshëm. Duam që ata të japin gjithçka, ashtu si ne do ta bëjmë në fushë”.

Kjo ndeshje është përsëritja e përballjes së Rrethit të 16-të të Ligës së Kampionëve në mars 2024, kur Inter fitoi 1-0 në “San Siro” dhe humbi 2-1 në Madrid, duke u eleminuar më pas në penallti.

Simeone shtoi: “Disa lojtarë ishin aty dy vjet më parë, por çdo ndeshje është ndryshe. Ata ndryshuan trajner dhe disa gjëra të tjera. Inter është një skuadër e madhe që më pëlqen shumë, ndaj duhet të kemi kujdes ndaj potencialit të tyre dhe të japim maksimumin. Nuk është e lehtë të shpjegosh çdo gjë që sheh çdo ditë, kështu që nuk do të vij këtu dhe të tregoj se si Chivu ka ndryshuar Interin”.

Simeone ka disa shqetësime për gjendjen fizike, pasi portieri Jan Oblak dhe djali i tij Giuliano Simeone janë të dy të dyshuar për të luajtur.

Duke konsideruar të kaluarën e tij te Inter nga 1996 deri në 1999 dhe kohën që ka drejtuar në Serie A te Catania, a mendon Cholo se mund të bëhet një ditë trajner i Interit?

Ai pranoi: “Nuk e di, por po, e shoh veten një ditë si trajner i Interit gjatë rrugëtimit tim”./GazetaExpress/