Trajneri i Atletico Madrid, Diego Simeone, rrezikon ndëshkim nga UEFA për sjelljen e tij ndaj një tifozi të Liverpool gjatë humbjes 3-2 në “Anfield”.
Simeone u ndëshkua me karton të kuq pas golit të Virgil van Dijk, kur shpërtheu ndaj një tifozi. Pamjet treguan trajnerin argjentinas duke vrapuar drejt tifozit dhe duke u përfshirë në një përplasje të tensionuar.
Ai u mbajt me forcë nga stjuardët dhe sigurimi, ndërsa stafi i tij teknik nuk bëri shumë për ta qetësuar situatën. Ish-mesfushori i Lazios u përjashtua për sjelljen e tij, të cilën më pas e pranoi si “të pajustifikueshme” në konferencën për shtyp.
Simeone tha se kishte qenë në shënjestër të “fyerjeve” dhe “gjesteve” nga tribuna, duke shtuar:
“Shpresoj që Liverpool të përmirësojë atë aspekt dhe kur të identifikohet personi që e bëri këtë, të ketë pasoja.”
Pamjet treguan një tifoz të Liverpool duke bërë gjeste ndaj bankinës së Atletico pas golit të barazimit, por tifozi mohoi të kishte thënë diçka fyese.
Megjithatë, sipas rregullores së UEFA-s (Neni 63), çdo lojtar apo zyrtar i përjashtuar merr automatikisht një ndeshje pezullim. Ish-gjyqtari i UEFA-s, Eduardo Iturralde Gómez, beson se Simeone do të marrë gjithashtu një gjobë.
“Mendoj se Simeone do të marrë një gjobë prej 20,000 euro, që është minimumi. Ka gjasa të pezullohet një ndeshje, dhe me shumë gjasa do të mbetet edhe ‘pezull’. Çfarë do të thotë kjo? Nëse përsëritet brenda vitit, atëherë do të vuajë edhe ndalimin shtesë,” tha ai në programin radiofonik El Larguero.
Simeone nuk pranoi të tregonte detaje për fyerjet, por tha se e dinte “çfarë ndodhi pas bankinës”.
Ndërkohë, Jonny Poulter, tifozi në qendër të incidentit, reagoi me një video një-minutëshe në rrjete sociale duke e quajtur Simeonen “frikacak”.
Ai tha:
“Kam marrë me qindra mesazhe në çdo platformë, njerëzit më pyesin ‘çfarë the, çfarë tha ai?’. Nuk thashë asgjë përveç ‘hej, hej, f*** off, kemi fituar’, siç bën zakonisht. Por ai bëri të njëjtën gjë ndaj nesh kur shënuan. Ai dhe ndihmësi i tij, duke provokuar përpara nesh. Normalisht që u thirrën me fjalë fyese.”
Poulter gjithashtu akuzoi ndihmës-trajnerin e Simeones se “erdhi dhe pështyu mbi të” pas shpërndarjes së pamjeve.
SPORTbible ka kontaktuar Atletico Madrid për një reagim por ata nuk janë përgjigjur. /GazetaExpress/
