Kryetari i Minneapolis, Jacob Frey, ka njoftuar se disa agjentë federalë do të fillojnë të largohen nga qyteti të martën, pas zemërimit në rritje për vdekjen e Alex Pretti, një infermier i njësisë së kujdesit intensiv i vrarë nga agjentë të zbatimit të ligjit federal më 24 janar.

Frey tha se kishte biseduar me presidentin Donald Trump, i cili konfirmoi se një pjesë e operacionit do të tërhiqet.

Ai gjithashtu u takua të martën me Tom Homan, i njohur si “border czar” i administratës, për të diskutuar hapat e ardhshëm.

“Minneapolis do të vazhdojë të bashkëpunojë me autoritetet e shtetit dhe federale në hetimet e krimeve të vërteta,” tha Frey raporton The Guardian.

“Por ne nuk do të marrim pjesë në arrestime që shkelin kushtetutën të fqinjëve tanë, apo të zbatimit të ligjit federal të emigracionit.”

Presidenti Trump është shprehur se “po bëhet përparim i madh” në operacion, dhe se biseda me kryetarin Frey ishte “shumë e mirë”.

Vdekja e Prettit – një 37-vjeçar i cili po monitoronte praninë e agjentëve federalë në rrugët e qytetit kur u qëllua dhe vdiq – ka shkaktuar protesta të gjera dhe kritika të forta, duke shtuar presionin për të hetuar ndërhyrjet e fuqishme të zbatimit të ligjit.

Kryebashkiaku Frey dhe udhëheqës të tjerë lokalë kanë kërkuar që agjentët federalë të largohen, ndërsa administrata Trump ka dërguar Homanin për të drejtuar operacionin në vend të komandantit të mëparshëm të Patrullës Kufitare, Greg Bovino, i cili pritet të largohet së bashku me një pjesë të forcave.