Gjendja e trajnerit legjendar të futbollit Mircea Lucescu është përkeqësuar, pasi 80-vjeçari është vendosur në koma të induktuar pas një ataku në zemër, ndërsa djali i tij ka lënë ndeshjen derbi të ekipit për të qenë pranë tij.

Trajneri, i cili u largua nga posti i përzgjedhësit të Rumanisë vetëm pak ditë më parë, ka qenë duke luftuar me aritmi të rënda, një gjendje që përfshin çrregullime të ritmit të zemrës dhe mund të jetë kërcënuese për jetën.

Sipas raportimeve, ai pësoi një sulm në zemër të premten në mëngjes, më pak se një javë pasi dha dorëheqje nga detyra te Rumania, pasi ishte rrëzuar gjatë një mbledhjeje të ekipit.

Të premten, një deklaratë nga spitali universitar në Bukuresht e përshkroi gjendjen e tij si “stabile”, por raportet e fundit në Rumani thonë se ai mund të ketë vetëm disa ditë jetë.

Familjarët kanë nxituar të jenë pranë tij – bashkëshortja Neli dhe mbesa Marilu ndodhen në spital, ndërsa djali i tij, Razvan Lucescu, trajner i PAOK, ka lënë ekipin gjatë derbit me Panathinaikos për të qenë pranë babait.

Mihai Stoichita, drejtori teknik i kombëtares rumune, e vizitoi në spital dhe tha se nuk ka mundur të komunikojë me të.

“Qëndrova pranë tij për rreth pesë minuta, nuk përgjigjet fare, gjë që është normale. Le të shpresojmë që do të bëhet mirë, në dashtë Zoti. Nuk mund të flasë. Ndoshta është në gjendje të induktuar për ta ndihmuar,” tha ai, duke shtuar se nuk mund të japë parashikime për shkak se nuk është mjek.

Fillimisht kishte shpresa për rikuperim, pasi Lucescu kishte kryer një operacion në zemër dhe i ishte vendosur një stent i pestë për të mbajtur arteriet të hapura dhe për të përmirësuar qarkullimin e gjakut.

Madje, thuhej se kishte filluar të fliste dhe të ulej, por gjendja e tij është përkeqësuar në orët e fundit.

Mircea Lucescu ka pasur një karrierë të gjatë si lojtar, duke zhvilluar 64 ndeshje me Rumaninë, ndërsa nisi karrierën si trajner në vitin 1979.

Ai drejtoi për herë të parë kombëtaren nga viti 1981 deri në 1986 dhe më pas ka qenë trajner i klubeve të mëdha si Inter, Galatasaray dhe Besiktas.

Në vitet e fundit ai ka drejtuar Turqia (2017–2019) dhe Dynamo Kyiv (2020–2023), ndërsa u rikthye te Rumania në vitin 2024.

Ndërkohë, ndeshja mes PAOK dhe Panathinaikos pritet të zhvillohet të dielën në orën 17:00, por pa trajnerin e tyre në stol për shkak të kësaj situate të rëndë familjare./GazetaExpress/