Paris Saint-Germain e ka lënë  Gianluigi Donnarumman jashtë skuadrës për ndeshjen e Superkupës së UEFA-s kundër Tottenham Hotspur në Udine, një shenjë e mëtejshme se koha e italianit në klub po mbaron.

Ndeshja do të zhvillohet në “Stadio Friuli” të mërkurën në mbrëmje, si hapja tradicionale e sezonit mes fituesve të Ligës së Kampionëve dhe mbajtësve të trofeut të Ligës së Europës.

Tensioni mes portierit dhe klubit po rritet në nivele të reja, pasi bisedimet për një kontratë të re kanë dështuar përfundimisht.

Aktualisht, kontrata e tij skadon në fund të sezonit, kështu që ai mund të largohet si lojtar i lirë në qershor të vitit 2026, ndërkohë që PSG-ja ka nënshkruar tashmë me zëvendësuesin e tij, Lucas Chevalier.

PSG i dërgon një mesazh të fortë Donnarummas

Nëse Donnarumma kishte shpresuar të garonte me portierin e ri për vendin titullar, atëherë Luis Enrique i ka dërguar një mesazh të qartë duke e lënë jashtë listës së udhëtimit.

Kjo sugjeron se portieri e ka zhvilluar tashmë ndeshjen e tij të fundit me fanellën e Paris Saint-Germain, pavarësisht se ndihmoi ekipin të fitonte katër trofe sezonin e kaluar, përfshirë edhe triumfin në Ligën e Kampionëve.

E ardhmja e tij më e mundshme pritet të jetë në Premier League, me Manchester United favoritë për nënshkrimin e tij, përpara Manchester City dhe Chelsea.

Galatasaray dhe Bayern Munich kanë shfaqur gjithashtu interes, por Inter dhe Juventus do ta kishin të vështirë të përballonin pagën e tij. /GazetaExpress/