Në dokumentet më të fundit të publikuara për shkelësin seksual Jeffrey Epstein është zbuluar se ai, në vitin 2014, kishte dëshirë të blinte anijen ushtarake Olimp M-46.
Sipas dokumenteve të publikuara, lidhja për blerjen e kësaj anijeje ishte Boris Nikolić, një mjek nga Kroacia që kishte punuar për themeluesin e Microsoft-it, Bill Gates, raporton Klix.ba, përcjell Insajderi.
Sipas e-mail-eve, Nikolić e kishte lidhur Epstein-in me Zoran Kovačin, i cili iu prezantua Epstein-it si “një njeri që merret me shitblerjen e anijeve”.
Zoran Kovač është ndërtues dhe drejtor i kompanisë Sigma Stan, e cila merret me ndërtimin e objekteve luksoze të banimit në Zagreb dhe Zadar.
Në dokumentacion gjendet edhe një fletë informuese për mjetin lundrues Olimp M-46, i cili i ishte ofruar Epstein-it si një version më i mirë i anijes që ai kërkonte. Ai ishte zhvilluar në Institutin Detar në Zagreb.
Edhe pse nga dokumentet nuk është plotësisht e qartë se kush ishte shitësi zyrtar, Kovač në disa e-mail-e kishte deklaruar se bëhej fjalë për një “rreth të mbyllur njerëzish”.
Kur u gjet anija që Epstein dëshironte të blinte, pesë vjeçare, u theksua se ajo “nuk shitet për qëllime civile”, por se do të “bëhej një përjashtim” pasi blerësi ishte nga SHBA-ja.
Në disa e-mail-e pasuese, Epstein kërkoi nga Kovač informacione shtesë, ndërsa bashkëbiseduesi nga Kroacia e nxitte duke thënë se “ekziston interes nga ushtria greke”.
Në një nga e-mail-et, Kovač shkruan se “po e thërrasin njerëz nga ushtria”, pas së cilës pritej finalizimi i shitjes. Anija u dërgua në ishullin St. Thomas, i cili ndodhet pranë ishujve në pronësi të Epstein-it.
Megjithatë, në atë moment lindën komplikime, pasi Kovač përfshiu një kompani zvicerane të paemërtuar, ndërsa Epstein u pyet se cilat do të ishin kostot shtesë për blerjen e anijes.
Në fund, Kovač i dërgoi Epstein-it një e-mail të gjatë, në të cilin kërkonte konfirmim se do ta blinte anijen, duke thënë se nuk i dinte cilat do të ishin shpenzimet shtesë. Epstein u përgjigj duke thënë që “ta harrojë gjithçka”, dhe blerja e këtij mjeti lundrues nuk përmendet më në dokumente.
