Prishtina dhe Drenica janë dy skuadrat e vetme të IPKO Superligës që asnjëherë nuk kanë rënë në Ligën e Parë. Mirëpo, drenicasit po rrezikojnë shumë seriozisht që ta njollosin këtë histori të tyre në këtë stinor.

Sivjet nga IPKO Superliga do të bien katër ekipe në mënyrë që prej edicionit të ardhshëm elita të zvogëlohet nga 12 në 10 skuadra. Dhe, kjo ka bërë që Drenica të kaplohet nga rreziku, raporton Gazeta Express.

Katër humbje në katër ndeshjet e fundit kanë bërë që kuqezinjtë të bien në vendin e nëntë. Siç dihet, ekipet që kampionatin e mbyllin në pozitat 9, 10, 11 dhe 12 bien nga Liga.

Momentalisht në këto pozita janë Drenica, Ferizaj, Vushtrria dhe Dukagjini i fundit. Fitorja e fundit e Flamurtarit ndaj Vushtrrisë ka bërë që ekipi prishtinas t’i ikë zonës së rrezikshme, përkatësisht vendit të nëntë. Kurse, tani aty është ekipi nga Skenderaj që po përjeton krizë rezultatesh.

Sidoqoftë, vetëm Dukagjini duket i dorëzuar, e deri diku edhe Vushtrria. Kurse, për Ferizajn dhe Drenicën ka ende shpresa pasi larg tyre nuk janë Flamurtari e Trepça ’89, por as Llapi. /GazetaExpress/