Dy shtetas britanikë janë ndaluar në Francën veriore me dyshimin se planifikonin t'i bashkoheshin një proteste të ndaluar të ekstremit të djathtë, thanë prokurorët.

Dy burrat, të moshës 35 dhe 50 vjeç, u arrestuan pranë Calais të dielën pasi "transmetuan video drejtpërdrejt", tha prokurorja Cécile Gressier për BBC-në, transmeton Gazeta Express.

Ajo shtoi se ata u ndaluan për "nxitje të urrejtjes" dhe "pjesëmarrje në një grup me qëllim përgatitjen e akteve të dhunës".

Kjo vjen pasi autoritetet franceze javën e kaluar thanë se do të deportonin menjëherë këdo që vinte nga Mbretëria e Bashkuar për të marrë pjesë në demonstratat e planifikuara kundër emigrantëve gjatë fundjavës.

Kishte pasur thirrje në mediat sociale të Mbretërisë së Bashkuar për aktivistët kundër emigrantëve që të merrnin pjesë në një protestë në zonën e Francës veriore ku nisen anije të vogla për të transportuar azilkërkuesit përtej Kanalit.

Demonstrata e ashtuquajtur "Operacioni Overlord" u ndalua nga autoritetet franceze.

"Këta individë u arrestuan gjatë një kontrolli identiteti, ndërsa po postonin një video në mediat sociale që dyshohet se përmbante komente diskriminuese dhe dëshmonte për pjesëmarrjen e tyre të mundshme në këtë organizatë", tha prefektura e Pas-de-Calais në një deklaratë.