Milani pësoi dy dëmtime të mëdha në ndeshjen kundër Parmës, pasi Matteo Gabbia u tërhoq gjatë nxehjes, ndërsa Ruben Loftus-Cheek u largua me barrelë pas një dëmtimi në kokë.

“Rossonerëve” i mungonte tashmë Santiago Gimenez për këtë përballje në “San Siro”, ndërsa Strahinja Pavlovic ishte i gatshëm vetëm për bankinën pas një mavijosjeje në kërcirin e këmbës.

Në një rol të pazakontë, mbrojtësi i krahut Davide Bartesaghi po aktivizohej si pjesë e treshes së mbrojtjes, por skuadra u detyrua të bëjë një tjetër ndryshim para fillimit të ndeshjes.

Gabbia ishte përfshirë fillimisht në formacionin titullar, por u tërhoq për shkak të problemeve muskulore gjatë nxehjes dhe u zëvendësua nga Koni De Winter.

Vetëm pak minuta pas nisjes së takimit, Milani pa Loftus-Cheek të përplasej fort me portierin e Parmës, Edoardo Corvi, ndërsa të dy tentuan të arrinin një krosim “rabona” nga Alexis Saelemaekers.

Mesfushori anglez pësoi më keq nga përplasja dhe u largua me barrelë për shkak të një dëmtimi në kokë.

Në fytyrën e tij u pa gjak, çka ngre dyshime për një frakturë të mundshme të mollëzës, megjithëse “DAZN Italia” raportoi se dëmtimi më i madh ishte në dhëmbë.

Ai është dërguar në spitalin lokal për ekzaminime të mëtejshme, por nuk e humbi asnjëherë ndjenjat.

Loftus-Cheek u zëvendësua nga Ardon Jashari vetëm 11 minuta pas fillimit të ndeshjes./GazetaExpress/