Një hetim i BBC ka zbuluar një rrjet burrash që filmonin fshehurazi gratë gjatë daljeve të natës dhe më pas fitonin para duke i publikuar videot e tyre në internet. Në mesin e tyre, janë edhe dy vëllezër shqiptarë, Florjan dhe Roland Reka.

Videot, që shpesh përshkruhen si “ture ecjeje” ose “përmbajtje jete nate”, publikohen në YouTube, TikTok, Facebook dhe Instagram. Ato përqendrohen pothuajse tërësisht te gratë me fustane dhe funde, shumë prej tyre të filmuara nga mbrapa ose nga kënde të ulëta, duke zbuluar ndonjëherë pjesë intime të trupit.

BBC ka gjurmuar rreth 50 gra që ishin filmuar dhe ka zbuluar se shumë prej tyre nuk ishin në dijeni të asaj që kishte ndodhur. Ato shprehën ndjenja frike dhe poshtërimi.

Një grua 21-vjeçare, e cila ishte filmuar nga një kënd i ulët që i zbulonte nën fund, tha se ishte ndikuar aq shumë nga fakti që pamjet e saj ishin publikuar pa pëlqimin e saj, saqë tani ndihet paranojake sa herë që del nga shtëpia.

BBC-ja ka identifikuar më shumë se 65 kanale online me këtë lloj përmbajtjeje, videot e të cilave janë parë së bashku më shumë se tre miliardë herë gjatë tre viteve të fundit. Videot fokusohen në daljet e natës në qytete të mëdha anembanë botës, përfshirë Londrën, Oslon, Miamin dhe Bangkokun – por një nga vendndodhjet më të njohura është Manchesteri.

Ekipi ka vepruar në fshehtësi në qytet, duke filmuar burra teksa regjistronin fshehurazi gratë gjatë një nate jashtë, duke ekspozuar disa nga operatorët më aktivë, të lidhur me 12 llogari. Mes tyre kishte një shofer taksie vendas dhe dy burra që kishin udhëtuar nga Suedia për të filmuar në Mbretërinë e Bashkuar. Dy burra të tjerë, kanalet e të cilëve pretendojnë se janë të bazuara në Norvegji dhe Monako, u panë duke filmuar, por identitetet e tyre nuk kanë arritur t’i konfirmojnë.

Ishte fundi i tetorit të vitit të kaluar, kur Grace ndodhej jashtë një klubi në Manchester duke bërë foto me telefonin e saj ndërsa festonte ditëlindjen e 21-të të shoqes. Me to ishte edhe motra e saj më e vogël, Sophie(emër i ndryshuar). Ajo sapo kishte mbushur 18 vjeç dhe ishte hera e parë që dilte në klube në qytet.

“Ishte një natë normale,” thotë Grace. “Nuk kishim absolutisht asnjë ide që po na filmonin.”

Vetëm pasi u kontaktua nga BBC, ajo zbuloi se një video e atij momenti ishte publikuar në YouTube. Pamjet që i zbulonin pjesën poshtë fundit ishin parë më shumë se tre milionë herë nga të panjohur në internet.

“E kisha planifikuar me kujdes veshjen time,” kujton Grace. “Nga niveli i syve gjithçka ishte e mbuluar. Por këndi i pamjeve ishte më i ulët. Kjo më bëri të mendoj: sa afër ishte ai?”

Edhe Sophie shfaqej në video, por nuk ishte në qendër të vëmendjes. Ajo thotë se, ashtu si motra e saj, tani është “plotësisht paranojake” për shkak të asaj që u ndodhi.

“Nuk kam dalë më, sepse jam thjesht e frikësuar,” thotë ajo. “Kjo nuk është normale. Nuk duhej të kishte ndodhur.”

Kanali që publikoi videon e Grace dhe Sophie drejtohet nga një burrë që BBC e ka identifikuar si Florjan Reka, 35 vjeç, me bazë në Suedi.

Ai drejton një nga kanalet më aktive të këtij lloji në YouTube, me afro 200 milionë shikime dhe 399 mijë abonentë, dhe ka gjithashtu një faqe në Facebook me më shumë se 600 mijë ndjekës. Sipas raportimit, ai e kishte regjistruar kanalin e tij si biznes në Suedi, ku pretendon se ushtron “aktivitete influenceri, marketingu dhe reklame”.

Ai është përcjellë në fshehtësi. Ekipi e ka përcjellë Florjan Rekën duke ecur me shpejtësi pak para orës 02:00 së bashku me një burrë tjetër, të cilin më vonë e kanë identifikuar si vëllain e tij – Roland.

Në një moment, vëllezërit dukeshin sikur po shikonin telefonat e tyre në lartësinë e belit. Por në të vërtetë, secili po mbante një kamerë të veçantë në të njëjtin nivel dhe po filmonte gratë teksa kalonin pranë tyre. Vëllezërit dukeshin të pavetëdijshëm se po vëzhgoheshin.

Ata janë parë duke filmuar jashtë klubeve të ndryshme dhe më pas ribashkoheshin gjatë gjithë natës.