Dy persona që po merrnin pjesë në garën vjetore të jahteve Sydney-Hobart në Australi kanë humbur jetën në incidente të ndara, sipas policisë.

Të dy anëtarët e ekuipazhit humbën jetën pasi u goditën nga bomi – shtylla e madhe horizontale e lidhur me fundin e velës.

Organizatorët e garës thanë se incidentet ndodhën në anijet Flying Fish Arctos dhe Bowline.

Anijet e para pritet të mbërrijnë në qytetin Hobart, në Tasmani, më vonë të premten ose herët të shtunën. Disa anije të tjera janë tërhequr tashmë për shkak të motit të keq.

Policia e Uellsit të Ri Jugor (NSW) tha se incidenti i parë u raportua pak para mesnatës të enjten sipas kohës lokale nga Autoriteti Australian i Sigurisë Detare në kryeqytetin Canberra.

Dy orë më vonë, në 02:15 të së premtes, policia e NSW u informua se ekuipazhi i anijes së dytë po jepte ndihmë të shpejtë për personin e dytë, por përpjekjet ishin të pasuksesshme.

Flying Fish Arctos po lundronte rreth 30 milje detare në lindje/juglindje të qytetit Ulladulla në NSW, sipas organizatorëve.

Ndërsa Bowline ndodhej rreth 30 milje detare në lindje/verilindje të qytetit Batemans Bay, gjithashtu në NSW.

"Mendimet tona janë me ekuipazhin, familjet dhe miqtë e të ndjerëve," thanë organizatorët në një deklaratë.

"Kjo garë është një traditë australiane, dhe është zemërthyese që dy jetë janë humbur në një kohë që duhej të ishte e gëzuar," tha Kryeministri australian Anthony Albanese.

Gara, e cila filloi të enjten, ka vazhduar.

Kjo nuk është hera e parë që ndodhin fatalitete gjatë garës, e cila u mbajt për herë të parë në vitin 1945.

Gjashtë persona, përfshirë jahtexhiun britanik olimpik Glyn Charles, humbën jetën në vitin 1998 pasi stuhitë e fuqishme goditën garuesit.