Klubi turk Fenerbahçe raportohet se ka kontaktuar AC Milanin për të pyetur jo vetëm për Christopher Nkunku, por edhe për Youssouf Fofana.

Afati kalimtar i janarit është hapur dhe “Rossonerët” kanë bërë tashmë një përforcim, duke siguruar Niclas Füllkrug nga West Ham United në huazim me të drejtë blerjeje në fund të sezonit.

Në këtë kontekst, ka pasur sugjerime se Nkunku mund të largohet vetëm gjashtë muaj pas transferimit të tij nga Chelsea.

Thuhet se Fenerbahçe është i interesuar për sulmuesin, i cili aktualisht është jashtë fushave për shkak të një dëmtimi në kyçin e këmbës.

Megjithatë, “Calciomercato.com” pretendon se ai nuk është i vetmi lojtar i Milanit që ka tërhequr interesin e klubit turk.

Ata kanë pyetur gjithashtu për mesfushorin Fofana, por ai është një titullar i rregullt nën drejtimin e trajnerit Max Allegri dhe ka shumë pak gjasa të shitet, përveç nëse vjen një ofertë shumë e madhe.

Reprezentuesi i Francës mbush 27 vjeç këtë muaj dhe u ble nga AS Monaco në vitin 2024 për 26 milionë euro./GazetaExpress/