Interi po shqyrton mundësinë për të transferuar dy lojtarë të Tottenham Hotspur: portierin Guglielmo Vicario dhe mbrojtësin Radu Dragusin, raporton Calciomercato.

Vicario ka pasur paraqitje solide që nga transferimi i tij te Tottenham, megjithëse nuk i ka shpëtuar kritikave për paqëndrueshmëri dhe vështirësi në menaxhimin e topave ajrorë.

Pavarësisht kësaj, Interi e sheh portierin italian si një opsion ideal për të forcuar portën dhe është i gatshëm t’i ofrojë atij një rikthim në Serie A.

Tottenham, nga ana tjetër, mund të mos jetë i gatshëm ta lëshojë lehtë Vicario-n, pasi aktualisht ai konsiderohet portieri më i mirë i skuadrës. Klubi londinez do të kërkonte fillimisht një zëvendësues të nivelit të lartë përpara se të pranonte largimin e tij.

Sa i përket Radu Dragusin, mbrojtësi rumun ka pasur vështirësi për të siguruar minuta të rregullta te Tottenham. Pas disa muajsh jashtë fushave për shkak dëmtimi, ai tashmë është rikthyer, por aktualisht konsiderohet zgjedhja e katërt në qendër të mbrojtjes. Në moshën 23-vjeçare, Dragusin ka nevojë për aktivizim të rregullt për të zhvilluar potencialin e tij.

Një rikthim në Itali shihet si opsion ideal për rumunin, i cili ka treguar formën më të mirë gjatë kohës te Genoa. Interi kërkon më shumë thellësi në repartin mbrojtës dhe Dragusin vlerësohet si një investim cilësor afatgjatë, ndërsa edhe Roma raportohet se është e interesuar për shërbimet e tij.

Mbetet për t’u parë se si do të zhvillohet situata në javët në vijim dhe nëse Interi do të arrijë marrëveshje me Tottenham për njërin apo të dy lojtarët. /GazetaExpress