Marcus Rashford është shumë pranë kalimit te Barcelona, pasi ka kaluar me sukses testet mjekësore dhe ka pranuar një ulje page prej 25% për t’u bashkuar me klubin katalanas në formë huazimi për një sezon. Barcelona do të mbulojë tërësisht pagën e 27-vjeçarit, ndërsa Manchester United ka vendosur edhe një çmim për blerjen përfundimtare të tij pas përfundimit të huazimit.

Njoftimi zyrtar për transferimin e Rashford pritet të bëhet gjatë kësaj jave, por ka një problem të madh: nuk ka garanci që ai do të mund të regjistrohet nga Barcelona për sezonin 2025/26.

Sipas analistit Andy Brassell, edhe pse Rashford ka bërë sakrifica për t’u bashkuar me Barcelonën, situata financiare e klubit dhe rregullat strikte të La Liga-s mund ta pengojnë regjistrimin e tij. Brassell tha për Trans Europe Express:

"Po, Rashford po heq dorë nga një pjesë e pagës për të ndodhur ky transferim, por nuk ka garanci që ai do të regjistrohet – të paktën nëse i besoni presidentit të La Liga-s, Javier Tebas."

Barcelona më herët dështoi të transferojë Nico Williams për arsye të ngjashme, me Tebas që deklaroi se klubi nuk ishte në gjendje të garantonte regjistrimin e tij. Situata e ngjashme ka ndodhur edhe me Jules Kounde dhe Dani Olmo, të cilët humbën ndeshje zyrtare për shkak të vonesave në regjistrim.

Barcelona duhet të veprojë shpejt për të siguruar që Rashford të jetë i gatshëm për ndeshjen hapëse të sezonit më 16 gusht kundër Real Mallorca. Përndryshe, një nga transferimet më të mëdha të verës mund të qëndrojë në tribunë për arsye burokratike.