Macclesfield shkroi historinë në FA Cup duke shkaktuar një nga surprizat më të mëdha të të gjitha kohërave, pasi eliminoi fituesit në fuqi, Crystal Palace, me fitoren 2-1 në raundin e tretë.

Pavarësisht diferencës prej 117 vendesh mes skuadrës së kategorisë së gjashtë dhe ekipit të Premier League, “Silkmen” triumfuan në një pasdite të paharrueshme në Leasing.com Stadium.

Golin e parë e shënoi kapiteni Paul Dawson me kokë pak para pushimit, ndërsa në minutën e 60-të Isaac Buckley-Ricketts dyfishoi shifrat pas një kaosi në zonë.

Palace, që sezonin e kaluar fitoi trofeun e parë madhor në histori duke mposhtur Manchester Cityn në finale, ngushtoi shifrat në minutën e fundit me një goditje dënimi spektakolare nga Yeremy Pinto.

Megjithatë, minutat shtesë nuk mjaftuan për përmbysje dhe vërshëllima finale solli skena feste, me tifozët e Macclesfield që pushtuan fushën.

Kjo fitore e bën Macclesfield skuadrën e parë jashtë ligave profesioniste që eliminon mbajtësit e FA Cup që nga sezoni 1908/09. Suksesi vjen si kapitulli më i fundit i një ringritjeje të jashtëzakonshme: klubi ishte përjashtuar nga National League pesë vite më parë për shkak të borxheve, por që prej rikthimit në vitin 2021 ka siguruar tre ngjitje kategorie në katër sezone.

Skuadra e drejtuar nga John Rooney, vëllai i Wayne Rooneyt, luajti gjithashtu nën emocione të forta pas ndarjes nga jeta të sulmuesit 21-vjeçar Ethan McLeod muajin e kaluar. “Nuk e mendoja se ishte e mundur, por në futboll gjithçka mund të ndodhë,” deklaroi Rooney pas ndeshjes.

Në anën tjetër, kjo ishte një ditë e errët për Crystal Palace. Trajneri Oliver Glasner e pranoi hapur dështimin: “Nuk treguam cilësi, nuk krijuam raste dhe e merituam humbjen.”

Macclesfield vazhdon ëndrrën në FA Cup, duke dëshmuar edhe një herë magjinë e këtij kompeticioni legjendar. /GazetaExpress