Barcelona ka pasur një fazë të plotë përgatitore këtë verë, por nuk ka kaluar shumë kohë që lodhja e garës të japë efekt tek lojtarët e saj. Pas largimit nga grumbullimi i Holandës të shtunën për shkak të shqetësimeve fizike, Frenkie de Jong është tashmë një dyshim serioz për ndeshjen e radhës të Barcelonës.

Hansi Flick nuk do të ketë në dispozicion as Gavi-n, pasi te Barcelona është identifikuar se dhimbja në gjurin e tij lidhet me një problem në menisk. Ai pritet të mungojë të paktën edhe për dy javët e ardhshme, në varësi të mënyrës se si do të zhduket dhimbja.

De Jong u zëvendësua në minutat e fundit të barazimit 1-1 të Holandës kundër Polonisë të premten, me trajnerin Ronald Koeman që konfirmoi se lojtari kishte ndjerë shqetësime dhe nuk donin të rrezikonin. Të shtunën ai u rikthye në Barcelonë dhe sot iu nënshtrua testeve në qendrën stërvitore të klubit. Sipas raportimit të Alex Pintanel, pas kontrolleve, ai është “dyshim serioz” për ndeshjen e së dielës kundër Valencias.

Barcelona ka konfirmuar dëmtimin e De Jong-ut, megjithëse nuk ka dhënë një afat rikuperimi. Sipas “Mundo Deportivo”, katalanasit nuk duan të nxitojnë me rikthimin e tij, pasi e kanë me prioritet ndeshjen e Ligës së Kampionëve ndaj Newcastle United të enjten e ardhshme, ku duan ta kenë mesfushorin gati.

Kjo situatë duket se po i hap rrugë Marc Casado-s për të qenë titullar, pasi deri më tani ka zhvilluar vetëm një pjesë loje nga minuta e parë ndaj Levantes. Ndërkohë, Marc Bernal pritet të rikthehet nga dëmtimi këtë muaj, por klubi planifikon ta fusë gradualisht adoleshentin në skuadër.