Një nga arsyet që votuesi amerikan do të votojë për Biden është Trump, dhe një nga arsyet që do të votojë për Trump është Biden!
Shkruan: Martin Berisha
Ky do të ishte emëruesi i përbashkët që përmbledh mendimin e atyre amerikanëve që nuk janë entuziastë për asnjë nga kandidatët presidencialë. Pra, votuesi duhet të përzgjedhë njërën nga kjo ofertë dhe cilado zgjidhje ofron rrugë ose politikë krejtësisht diametralisht të kundërt për të ardhmen, të përfaqësuar dhe të mbështetur nga kandidati republikan dhe Presidenti i tanishëm Donald Trump dhe kandidati demokrat dhe ish-nënkryetari Joseph Biden.
Edhe pse Biden nuk mund të konsiderohet kandidati më i mirë presidencial që ka qenë ndonjëherë, ai konsiderohet një njeri i mirë. Për dallim nga Trumpi i cili është jokonvencional, Biden është i aftë të ndërtojë konsensus. Kjo u jep amerikanëve shpresë se ai do të rivendosë rendin për të sunduar në vend dhe në të gjithë botën.
Nga ana tjetër, Trump në ballafaqimin e parë e sulmoi kundërshtarin gjatë fushatës zgjedhore me qëllim të largojë vëmendjen nga politikat e tij të gabuara. Për ta arsyetuar këtë qasje të Trumpit. ish-senatori i shtetit Ohio CapriCafaro tha: "Qeverisja dhe politika nuk e kanë ndryshuar Trumpin, por anasjelltas". Me sjelljet e veta Trump e ka bërë politikën e shtetit më konfliktuale dhe të vrazhdë. Ai i përshkruan mediat si false dhe kanali i tij i preferuar për të komunikuar me publikun janë rrjetet sociale, ku merret me demokratët dhe kritikët e tij.
Nëse Trump fiton zgjedhjet, ai do ta kuptojë këtë si konfirmim të politikës së tij jokonvencionale - përçarëse dhe si nxitje për të vazhduar në atë rrugë. Në rast të disfatës, rezultatin e zgjedhjeve do ta trajtojë si të manipuluar dhe të mashtruar, gjë që e ka paralajmëruar paraprakisht.
Fragmentimi i shoqërisë amerikane, i cili është thelluar gjatë 40 viteve të fundit, do të vazhdojë pa marrë parasysh se cili kandidat fiton. Sipas Trump, megjithatë, Shtetet e Bashkuara janë bërë edhe më konservatore, kryesisht për shkak të ndryshimeve nëpër gjykatat federale, të cilat nuk do të mund të rregullohen kaq shpejt. Kushdo që zgjidhet president i Shteteve të Bashkuara, megjithatë do të përballet me sfidën e madhe për të drejtuar një vend në mes të një pandemie, recesioni dhe një ndarjeje të thellë shoqërore.
Trump ka qenë i fiksuar me Obamacare që nga zgjedhjet e para, ose reformën e kujdesit shëndetësor të prezantuar nga Obama. Ai premtoi ta shkatërrojë atë dhe të prezantojë "reformën e tij të mrekullueshme të kujdesit shëndetësor". Por ai ka folur për këtë për katër vjet dhe gjatë gjithë asaj kohe ai nuk ka paraqitur ndonjë plan në këtë fushë. Biden, një ish-nënkryetar Obama, njoftoi se ai do të përmirësojë punën e ish-shefit të tij dhe do të prezantojë një mundësi publike për qytetarët e varfër përveç atij privat brenda Obamacare. Reforma do të quhet "bidencare". Sidoqoftë, nuk do të shfuqizojë kujdesin shëndetësor privat.
Trump ka ndryshuar pikëpamjet dhe bindjet e tij politike rreth abortit dhe komunitetit LGBT disa herë në të kaluarën. Ai e mbështeste të drejtën e abortit pasi ishte republikan dhe president, nuk e bëri. Ai dikur ishte në favor të legalizimit të martesave të të njëjtit seks, më vonë duke ndryshuar mendim. Edhe pse ai do të hynte në histori si presidenti i dytë katolik i Shteteve të Bashkuara pas John F. Kennedy, Biden është shumë progresiv në çështje të tilla si e drejta për abort dhe e drejta për marrëdhënie të të njëjtit seks. Biden është i bindur se aborti duhet të mbetet një opsion ligjor, megjithëse mendimi i tij personal është se aborti është gjithmonë një vendim i gabuar, dhe ai nuk dëshiron t'ua imponojë atë mendim të tjerëve. Ai gjithashtu mbështet një politikë të lejimit të personave transgjinorë të bashkohen me ushtrinë, të cilën Trump e ka shfuqizuar.
Pas të shtënave masive në Teksas dhe Ohio vitin e kaluar, ai shprehu mbështetje reformës për armëmbajtje në SHBA dhe potencoi, që ata duhet të bëjmë kontroll më të rreptë të klientëve dhe të parandalojnë shitjet për ata individë që paraqesin kërcënim. Sidoqoftë, ai më vonë nuk bëri asgjë në atë drejtim. Në vend të kësaj, ai mbrojti në mënyrë të përsëritur Amendamentin e Dytë të Kushtetutës së SHBA-së, i cili flet për të drejtën e amerikanëve për të poseduar armë.
Biden nuk e kundërshton këtë të drejtë, megjithëse kampi i Trump ka akuzuar vazhdimisht Demokratët se po bëjnë presion për tërheqjen e Amendamentit të Dytë. Por Biden do të fuste kontrolle të rrepta dhe do të zgjaste procesin e marrjes së licencës për armë zjarri, duke ndaluar shitjen dhe prodhimin e armëve të rënda, të cilat ai i përshkroi si armë ushtarake, dhe prezantimin e një programi për të blerë armë të tilla për t'i hequr ato nga rrugët amerikane.
Dhe me ne fund, fituesi do të dihet varësisht prej asaj se kush do të fitojë Pensilvanian dhe/apo Floridën ose ndoshta do të kemi mos pranim rezultatesh, por një gjë është e tejet e sigurt; fituesi me doemos do të inaugurohet në janar në Shtëpinë e Bardhë.
