Përplasja mes vlerave lokale amerikane dhe kërkesave të federatave të futbollit nga Lindja e Mesme ka hyrë në fazë të re.

Ndërsa botërori i vitit 2026 po afrohet, organizatorët në Seattle konfirmuan se aktivitetet e planifikuara për Pride Weekend do të zhvillohen normalisht gjatë ndeshjes së 26 qershorit mes Egjiptit dhe Iranit, pavarësisht kundërshtimeve të forta nga të dy vendet, raporton The Guardian.

Kërkesa nga Egjipti dhe Irani: Ndaloni çdo aktivitet LGBTQ+

Sipas The Guardian, Federata Egjiptiane e Futbollit ka dërguar një letër zyrtare në FIFA, duke kërkuar pezullimin e çdo aktiviteti të lidhur me Pride gjatë ndeshjes së grupit G në Seattle.

Federata egjiptiane i ka cilësuar aktivitetet si “kontradiktore me vlerat kulturore, fetare dhe sociale” dhe ka paralajmëruar për tensione mes tifozëve nëse ato zhvillohen. Edhe kreu i Federatës Iraniane të Futbollit, Mehdi Taj, u citua nga media shtetërore iraniane duke e konsideruar nismën si “të paarsyeshme” dhe si mbështetje për “një grup të caktuar”.

Në Iran marrëdhëniet e të njëjtës gjini dënohen me ligj, madje edhe me dënime ekstreme, ndërsa në Egjipt përdorimi i ligjeve të moralit shpesh çon në ndjekje penale të personave LGBTQ+. Kjo e bën reagimin e tyre politikisht të pritshëm, por jo të detyrueshëm për organizatorët.

Seattle në vendosmëri

Me gjithë presionin e dy federatave, komiteti lokal organizues në Seattle e ka bërë të qartë se programi nuk do të ndryshojë.

Në një deklaratë, zëvendëspresidentja e komunikimeve e SeattleFWC26, Hana Tedesse, theksoi se aktivitetet zhvillohen jashtë stadiumit dhe janë pjesë e traditës së qytetit për të promovuar barazinë.

Organizatorët po punojnë me artistë, aktivistë dhe biznese lokale për të shfaqur kulturën e Pride gjatë gjithë fundjavës.

Ideja e “Pride Match” është konceptuar nga vetë komiteti i Seattle, si një mënyrë për të treguar para botës historinë e qytetit në mbrojtje të të drejtave civile.

Qëndrimi i FIFA-s

FIFA ka kontroll operacional mbi stadiumet ditën e ndeshjes, por sipas raportimeve të The Guardian, nuk kishte plane zyrtare për të shënuar Pride brenda stadiumit.

Gjithsesi, flamujt përkatës do të lejohen, një politikë që FIFA ka zbatuar edhe në Katar, pas disa polemikave të ashpra në 2022.

Seattle e ka të qartë, të gjithë tifozët, pa përjashtim, janë të mirëpritur.

Qyteti është shtëpia e një komuniteti të madh iraniano-amerikan dhe diasporës egjiptiane, dhe organizatorët premtojnë një atmosferë të respektueshme dhe gjithëpërfshirëse.

Në fund të ditës, kjo përplasje mes traditës dhe progresit modern krijon një precedent interesant për mënyrën se si Botërori 2026 do të trajtojë çështjet sociale.

Kështu, Seattle ka zgjedhur të mos e zbehë identitetin e saj për mirëpritjen dhe respektimin e barazisë.