Formimi i qeverisë së re në Kosovë dhe mesazhi se dialogu me Beogradin është prioritet, së bashku me paralajmërimin për një takim në nivel të lartë, tregojnë se BE synon të rrisë angazhimin politik, vlerëson Milosh Pavkoviq nga Qendra për Politikat Evropiane.

Përfaqësuesja e Lartë e Bashkimit Evropian Kaja Kalla tha se qeveria e re e Kosovës është “një shtysë e re” për dialogun dhe shprehu gatishmërinë për të pritur një takim të shpejtë.

“Kjo është një sinjal i fortë se BE dëshiron t’i japë dialogut më shumë peshë. Deri tani procesi është zhvilluar kryesisht në nivel teknik, gjë që është treguar e pamjaftueshme. Përfshirja e Përfaqësueses së Lartë, si autoriteti më i lartë politik në këtë proces, mund të kontribuojë që palët të rikthehen në tryezë dhe më në fund të nisin një zbatim më serioz”, ka thënë Milosh Pavkoviq - Qendra për Politikat Evropiane.

Sa i përket temave të ardhshme, ekspertët ne Beograd vlerësojnë se fokusi kryesor i BE-së, nga njëra anë, do të jetë formimi i Asociacionit të komunave me shumicë serbe, ndërsa nga Beogradi do të kërkohet zbatimi i obligimeve të marra në kuadër të dialogut.

“Nga Beogradi pritet të vazhdojë të jetë bashkëpunues, të mos bllokojë anëtarësimin e Kosovës në organizatat ndërkombëtare dhe të vazhdojë me zbatimin e detyrimeve të marra përsipër, për shembull çështjen e anëtarësimit në Këshillin e Evropës, e cila mund të riaktualizohet gjatë pranverës”, ka shtuar Pavkoviq.

Në lidhje me rolin e SHBA-së, Pavkoviq thekson se Uashingtoni aktualisht mbështet formatin e Brukselit dhe i ka lënë BE-së rolin udhëheqës në ndërmjetësim. Në Beograd vlerësohet se periudha në vijim do të tregojë nëse angazhimi i shtuar politik i BE-së do të sjellë përparim konkret, apo nëse procesi do të vazhdojë të mbetet i ngarkuar me mosbesim dhe zbatim të ngadaltë të marrëveshjeve./rtk