Elhami Shabani ka arritur deri në çerekfinale të Kampionatit Evropian të karatesë, që po mbahet në Poreç të Kroacisë.
Karateisti kosovar përfundoi në vendin e shtatë të kategorisë deri në 75 kilogramë.
Shabani kaloi tri raunde, përfshirë raundin e parë në të cilin kaloi pa luftë.
Në raundin e dytë mundi Jakub Matejka të Republikës së Çekisë, ndërsa në raundin e tretë fitoi ndaj turkut, Erman Eltemur, i teti në renditjen olimpike.
Elhamiu u ndalë në çerekfinale nga ukrainasi Stanislav Horuna, i pesti në renditjen olimpike “Tokyo2020”.
Garuesi ynë pati rastin të hyjë në garë për medaljen e bronztë, por në repesazh pësoi humbje nga holandezi, Timothy Petersen.
Dje garuan edhe karateistët tjerë kosovarë.
Fortesa Orana (+68 kg) dhe Herolind Nishevci (+84 kg), arritën suksesin më të madh, duke qenë një fitore larg medaljes së bronztë, lufta këto që zhvillohen të dielën.
Benjamin Shabani shënoi një fitore në kategorinë -84 kg.
Diellza Sejdijaj (-68 kg), u ndal në raundin e parë, ndërsa Adelina Rama (-61 kg), në të dytin. /Gazeta Express/
