Përballja midis Elon Musk dhe CEO-s të kompanisë Ryanair, Michael O’Leary, po zhvillohet në një konflikt të hapur.
Shkak është vendimi i linjës ajrore për të mos pajisur flotën e saj me sistemin satelitor Wi-Fi Starlink.
Përballja filloi kur Michael O’Leary deklaroi se Ryanair nuk ka ndërmend të instalojë sistemin Starlink në asnjë nga më shumë se 600 avionët e saj.
Kreu i kompanisë irlandeze përmendi rritjen e kostove të karburantit për shkak të rezistencës aerodinamike që, siç pretendoi ai, shkakton antena e sistemit, duke vlerësuar se përdorimi i Starlink do t’i kushtonte kompanisë deri në 250 milionë dollarë në vit.
Elon Musk u përgjigj nëpërmjet platformës X, duke pretenduar se O’Leary është “i keqinformuar” dhe se Ryanair nuk di si ta masë siç duhet ndikimin e pajisjeve në konsumin e karburantit.
Grindja u përshkallëzua kur O’Leary, duke folur në stacionin radiofonik irlandez Newstalk, tha se Musk “nuk di asgjë” për aviacionin dhe aerodinamikën, duke e quajtur atë një “idiot” dhe duke e përshkruar platformën X si një “pus plehrash”.
Musk u përgjigj me një gjuhë veçanërisht të ashpër të premten.
“CEO i Ryanair është një idiot i plotë. Shkarkojeni nga puna”, shkroi ai në X. Kur një përdorues komentoi se Musk mund të blinte Ryanair dhe të shkarkonte vetë O’Leary, miliarderi u përgjigj: “Ide e mirë”.
Rëndësia e Starlink në aviacion
Episodi nxjerr në pah rëndësinë në rritje të tregut të linjave ajrore për Starlink, rrjetin satelitor në orbitë të ulët të operuar nga SpaceX. Sistemi synon të ofrojë Ëi-Fi gjatë fluturimit më të shpejtë dhe më të besueshëm sesa teknologjitë ekzistuese.
Më shumë se dy duzina linjash ajrore kanë filluar ose njoftuar tashmë instalimin e Starlink në flotat e tyre, duke përfshirë United Airlines, Qatar Airëays dhe Lufthansa.
Edhe pse kushtet financiare të marrëveshjeve nuk janë zbuluar, analistët vlerësojnë se Starlink është një produkt premium, i synuar kryesisht për linjat ajrore me shërbim të plotë dhe me distanca të gjata, sesa për modelet me kosto të ulët si Ryanair.
