Elseid Hysaj ka hyrë zyrtarisht në historinë e Shqipërisë, duke u bërë lojtari me më së shumti paraqitje në kombëtaren kuqezi.
Mbrojtësi shkodran ka arritur shifrën rekord prej 94 ndeshjesh, duke kaluar çdo emër tjetër që ka veshur fanellën e Shqipërisë.
31-vjeçari, u fut në fushë në minutën 77-të në miqësoren ndaj Jordanisë, duke shijuar këtë moment të artë në karrierë.
Ky është një moment historik për mbrojtësin që aktivizohet me Lazion në Serie A dhe një shembull i përkushtimit, profesionalizmit dhe vazhdimësisë në shërbim të kombëtares shqiptare.
Që nga debutimi i tij në vitin 2013, Hysaj është bërë një shtyllë e mbrojtjes dhe një lider i vërtetë në fushë, duke kontribuar në sukseset më të mëdha të Kombëtares, përfshirë edhe pjesëmarrjen historike në Euro 2016 dhe Euro 2024.
Me këtë arritje, Elseid Hysaj vulos emrin e tij në librin e artë të Kombëtares shqiptare./GazetaExpress/
