Peter Mandelson u shkarkua nga posti i tij si ambasador i Mbretërisë së Bashkuar në SHBA në shtator. Kjo erdhi pasi dolën në dritë email-e që tregonin mesazhe mbështetëse që ai i kishte dërguar Epsteinit, pasi amerikani ishte dënuar në vitin 2008 për kërkim shërbimesh prostitucioni nga një i mitur. Qeveria tha se këto email-e tregonin se marrëdhënia e Mandelsonit me Epsteinin ishte “thelbësisht e ndryshme” nga ajo që dihej në kohën kur atij iu dha detyra.

“Libri i ditëlindjes”: Në dokumente të tjera të publikuara në shtator, Mandelson e quante Epsteinin “mikun tim më të mirë”, sipas një letre në një të ashtuquajtur “libër ditëlindjeje”. Një zëdhënës i Mandelsonit i tha BBC-së në atë kohë se ai kishte qenë prej kohësh i qartë se “i vjen shumë keq që është njohur ndonjëherë me Epsteinin”.

Miqësia me Epsteinin, “një gabim i tmerrshëm”: Muajin e kaluar, Mandelson i tha BBC-së se nuk kishte parë kurrë vajza në pronat e Epsteinit; një ditë më pas, ai u kërkoi personalisht falje viktimave të Epstein-it për vendimin e tij për ta ruajtur miqësinë pas dënimit të këtij të fundit.

Dokumentet sugjerojnë pagesa nga Epstein:
Të premten vonë, qeveria amerikane publikoi më shumë se tre milionë dokumente të lidhura me Epstein-in. Ndër më të fundit përfshiheshin pasqyra bankare që duket se tregojnë se Epstein ka dërguar tri pagesa të ndara në llogari të lidhura me Mandelsonin. Ish-ambasadori tha se nuk ka asnjë regjistër apo kujtesë për marrjen e këtyre shumave dhe se nuk e di nëse dokumentet janë autentike.

Një fotografi e redaktuar:
Veçmas, në paketën e fundit të dokumenteve të Epstein-it u zbuluan edhe imazhe të Mandelsonit me të brendshme. Në njërën nga fotografitë e redaktuara, ai shihet duke qëndruar pranë një femre, fytyra e së cilës nuk është e dukshme. Mandelson ka thënë se “nuk arrin ta identifikojë vendndodhjen apo gruan dhe nuk i kujtohen rrethanat”./BBC