E ardhmja e Endrick mund të marrë një kthesë të papritur gjatë afatit kalimtar të dimrit.

Sipas raportimeve nga Gjermania dhe Spanja, VfB Stuttgart ka hapur bisedimet me Real Madridin për të siguruar huazimin e sulmuesit të ri brazilian, me qëllim që t’i japë atij më shumë minuta loje të rregullta në Bundesligë, ndërsa gjiganti spanjoll do të vazhdojë ta mbikëqyrë zhvillimin e tij.

Skuadra e drejtuar nga Sebastian Hoeneß po has vështirësi në sulm për shkak të dëmtimeve të Ermedin Demirovic dhe Deniz Undav, dy prej lojtarëve më të rëndësishëm ofensivë.

Për këtë arsye, Stuttgart e sheh Endrickun 19-vjeçar si zgjidhjen ideale për të forcuar repartin e sulmit dhe për të ruajtur objektivin e tyre për kualifikim në Evropë.

Braziliani, i cili ka pasur pak minuta nën drejtimin e Xabi Alonsos, raportohet se është i hapur ndaj një huazimi që do t’i mundësonte të fitojë eksperiencë në një ambient më të qëndrueshëm dhe konkurrues.

Këtë sezon, ai ka qenë pas yjeve si Kylian Mbappé, Vinícius Jr. dhe Rodrygo, gjë që i ka kufizuar mundësitë e tij në Santiago Bernabéu.

Një faktor kyç që mund ta lehtësojë marrëveshjen është marrëdhënia e mirë mes Hoeneß dhe Alonsos, e ndërtuar gjatë kohës së tyre në Bundesliga.

Sipas mediave gjermane, trajneri i Real Madridit ka besim në aftësinë e Hoeneß për të zhvilluar talentet e rinj, çka e vendos Stuttgartin përpara klubeve të tjera të interesuara, si Marseille, Eintracht Frankfurt dhe RB Leipzig.

Burime pranë klubit gjerman raportojnë se negociatat tashmë kanë filluar dhe se huazimi potencial mund të zgjasë gjashtë muaj, me një opsion blerjeje të kushtëzuar dhe një angazhim për ta aktivizuar rregullisht në garat evropiane.

Në “Bernabéu”, Real Madridi nuk e përjashton mundësinë e largimit të përkohshëm të Endrickut, për aq kohë sa përmbushen disa kushte: ai duhet të luajë në një kampionat elitar, të ketë minuta të qëndrueshme dhe marrëveshja të mos përfshijë klauzolë blerjeje të detyrueshme.

Qëllimi është që ish-talentit të Palmeiras t’i jepet përvoja e nevojshme përpara se të konsolidohet plotësisht te ekipi i parë i Madridit.

Duke folur për “TNT Sports Brasil”, Xabi Alonso u shpreh:

“Të gjithë duan të luajnë, sidomos të rinjtë. Por duhet të kuptosh kontekstin – ne po garojmë në nivelin më të lartë dhe nuk ka gjithmonë hapësirë. Endrick duhet të jetë i durueshëm; momenti i tij do të vijë”, tha ai.

Një huazim te Stuttgart mund të jetë vendimtar për zhvillimin e një prej talenteve më të ndritur të Amerikës së Jugut. Në moshën vetëm 19-vjeçare, Endrick po kërkon minutat që i duhen për të vazhduar rritjen e tij dhe për t’u përgatitur për sfidën e madhe: të arrijë suksesin me Real Madridin.

Nëse marrëveshja realizohet, braziliani do të ishte një nga lëvizjet më të bujshme të merkatos së dimrit, ndërsa Stuttgart do të fitonte një yll në ngjitje, i aftë të mbajë gjallë ritmin dhe ambiciet e klubit në Gjermani./GazetaExpress/