Trajneri i Chelseat, Enzo Maresca, ka bërë shaka duke thënë se kartoni i kuq që mori në fund të fitores 2-1 ndaj kampionëve në fuqi të Premier League, Liverpool, ka qenë “i vlefshëm”, ndërsa ka folur edhe për “presionin” që ndjeu pas emërimit të tij fillestar në Stamford Bridge.

Trajneri italian ishte një nga folësit e ftuar në Festival dello Sport në Trento këtë fundjavë, së bashku me emra si Luciano Spalletti, Roberto Mancini dhe Zinedine Zidane.

45-vjeçari vjen pas një fitoreje të madhe ndaj Liverpool-it, por u përjashtua nga loja dy minuta para fundit për shkak të një kartoni të dytë të verdhë, pas golit vendimtar të Estevao në kohën shtesë.
Maresca ishte paralajmëruar që në pjesën e parë dhe mori kartonin e dytë kur doli nga zona teknike për të festuar me lojtarët e tij përpara tifozëve.

Duke folur në skenë gjatë festivalit, Maresca shpjegoi pse reagoi me aq shumë emocion pas atij goli të vonë dhe bëri shaka duke thënë se përjashtimi “ia vlente”:

“Është një ndjesi e mrekullueshme. Kjo është sezoni im i dytë në klub, por nuk kishim fituar kurrë në minutën e fundit në shtëpi më parë,” – tha Maresca.

“Reagimi që çoi në përjashtimin tim ishte instinktiv, por ndoshta ia vlente. Po flasim për një nga klubet më të mëdha në botë, që ka vuajtur për shumë arsye në vitet e fundit. Kur nënshkrova për herë të parë, ndjeva presionin e të qenit italiani i vetëm që nuk kishte fituar këtu (në Itali), por fatmirësisht nuk shkoi ashtu. Ta rikthesh këtë klub në majë është një ndjenjë shumë e kënaqshme.”

Maresca foli gjithashtu me detaje për fushatën fituese të Kupës së Botës për Klube gjatë verës dhe finalen kundër favoritëve të PSG-së:

“Bëmë një ndeshje të madhe. Ishte një situatë klasike: të gjithë i kishin ata si favoritë. Ne mposhtëm një ekip që, sipas mendimit tim, ishte më i forti në botë në atë moment. Por unë nuk shkoj në punë çdo ditë sepse fituam Kampionatin Botëror; e bëj sepse e dua këtë punë. Nuk zgjohem në mëngjes duke menduar për trofetë që kemi fituar. Luajtëm shtatë ndeshje të ndryshme, provuam ndryshime taktike për të surprizuar kundërshtarët. Ishte e vështirë, pati disa dëmtime, por ia vlejti. Trofeu është i mrekullueshëm – edhe pse pak i rëndë!”

Para triumfit në Kupën e Botës për Klube, Chelsea ishte shpallur gjithashtu kampion i Conference League, duke u bërë kështu skuadra e vetme që ka fituar të treja garat evropiane kryesore: Champions, Europa dhe Conference League.

“Ishte e vetmja garë që mund të fitonim,” – shpjegoi Maresca.

“I binda lojtarët e mi që ishte gjëja më e rëndësishme në botë. Dhe në fund, fituam dy tituj për dy muaj./GazetaExpress/