Presidenti i Turqisë, Recep Tayyip Erdogan, zhvilloi një telefonatë me homologun e tij iranian, Masoud Pezeshkian, për të diskutuar tensionet rajonale dhe incidentet e fundit që përfshijnë hapësirën ajrore turke.

Erdogan theksoi se çdo shkelje e hapësirës ajrore turke është e papranueshme dhe nuk mund të justifikohet për asnjë arsye. Ai shtoi se Turqia do të vazhdojë të marrë të gjitha masat e nevojshme për t’u përgjigjur incidentëve të tilla.

Nga ana e tij, Pezeshkian deklaroi se raketat që raportohen të kenë hyrë në hapësirën ajrore turke nuk ishin me origjinë iraniane dhe se do të kryhet një hetim i plotë për të përcaktuar burimin e incidentit.

Komentet vijnë pas neutralizimit nga mbrojtja ajrore e NATO-s të një tjetër rakete balistike që hyri në hapësirën ajrore turke. Erdogan gjithashtu theksoi se sulmet ndaj vendeve fqinje nuk i shërbejnë askujt dhe duhet të ndalen menjëherë.

Ai nënvizoi rëndësinë e rihapjes së kanaleve diplomatike dhe tha se Turqia po punon për të mbështetur përpjekjet që synojnë deeskalimin dhe dialogun në rajon. Erdogan shprehu gjithashtu keqardhje për humbjen e jetëve civile gjatë konflikteve, duke iu referuar veçanërisht sulmit ndaj një shkolle në Minab.

Gjithashtu, presidenti turk përsëriti ngushëllimet për ndarjen nga jeta të udhëheqësit suprem iranian, Ajatollah Ali Khamenei, dhe shprehu shpresën se zgjedhja e Mojtaba Khameneit si udhëheqës i ri suprem do të kontribuojë në paqen dhe stabilitetin rajonal.