Ish-trajneri i Manchester United, Erik ten Hag, ka gjetur një punë të re vetëm një ditë pas shkarkimit të pasardhësit të tij te “Red Devils”, Ruben Amorim.
Amorim, 40 vjeç, i cili u shkarkua të hënën më 5 janar, dhe Ten Hag, 55 vjeç, janë dy trajnerët e fundit që kanë provuar, por nuk kanë arritur, të rikthejnë Manchester Unitedin në lavdinë e tij të mëparshme.
Portugezi zëvendësoi Ten Hag si trajner i United në vjeshtën e vitit 2024, por qëndroi vetëm 14 muaj në “Old Trafford”, duke lënë klubin në vendin e gjashtë në Premierligë.
Një gjë që Amorim nuk arriti, megjithatë, ishte të fitonte një trofe me United, diçka që Ten Hag e kishte arritur dy herë kur “Red Devils” fituan Carabao Cup 2023 dhe FA Cup 2024.
Pavarësisht se kishte nënshkruar një kontratë të re me United pas triumfit në “Wembley” kundër Manchester City në maj 2024, Ten Hag u shkarkua pasi ekipi fitoi vetëm tre nga nëntë ndeshjet e para të sezonit 2024/25.
Holandezi, i cili më parë kishte drejtuar Ajax dhe ka qenë trajner te Bayern Munich, më pas u bë trajner i Bayer Leverkusen në Bundesliga, por qëndroi vetëm dy ndeshje në sezonin gjerman para se të shkarkohej më 1 shtator.
127 ditë më vonë, ai ka marrë një rol te klubi i Eredivisie, FC Twente.
Në një deklaratë zyrtare, kampionët e dikurshëm holandezë konfirmuan se Ten Hag do t’i bashkohet klubit më 1 shkurt dhe ka nënshkruar një kontratë deri në mes të vitit 2028 për të marrë rolin e drejtorit teknik, për shkak se drejtorin aktual teknik, Jan Streuer, pritet të pensionohet në fund të sezonit.
Ten Hag ka pasur më parë një pozicion stërvitor te klubi dhe ka zhvilluar 257 paraqitje si lojtar për Twente gjatë karrierës së tij. 55-vjeçari do të fillojë punën përpara sezonit 2026/27.
Duke folur për faqen zyrtare të klubit, Ten Hag tha: “Mendoj se është e mrekullueshme dhe speciale të kthehem te FC Twente, ku kam qenë tifoz në Het Diekman që nga fëmijëria ime. Karriera ime në futboll dhe trajnim filloi këtu. Me përvojën time në zhvillimin e të rinjve, ndërtimin e ekipeve dhe kulturën e sportit elitar, dua të forcoj bazën teknike të FC Twente së bashku me Bord-in Mbikëqyrës, menaxhmentin dhe stafin, në mënyrë që klubi të realizojë potencialin e tij në mënyrë të qëndrueshme si një flamur rajonal.”
Drejtori i përgjithshëm, Dominique Scholten, tha se Ten Hag dhe klubi kanë qenë në kontakt “të rregullt” për “muaj të tërë” para emërimit të tij.
“Erik ka një rekord të jashtëzakonshëm në futboll, dhe lidhja e tij me FC Twente ka mbetur gjithmonë shumë e fortë,” shtoi Scholten.
“Te FC Twente, ai ka shërbyer si trajner i të rinjve, kreu i akademisë dhe trajner asistent, dhe më pas si trajner dhe menaxher teknik në klube të njohura, si në nivel kombëtar, ashtu edhe ndërkombëtar. Ne kemi qenë në kontakt të rregullt gjatë muajve të fundit, dhe bisedat tona zbuluan një ambicie të fortë për të zhvilluar më tej FC Twente. Kjo ambicie përputhet me strategjinë që prezantuam së fundmi. Po e ngrisim nivelin dhe po profesionalizojmë më tej organizatën e futbollit. Hapin e parë në këtë drejtim e bëmë vitin e kaluar me ardhjen e Tim Gilissen”, e mbylli ai./GazetaExpress/
