Familjarët e Anthony Joshua kanë konfirmuar se ish-kampioni botëror i boksit po reagon pozitivisht ndaj trajtimit mjekësor, pas aksidentit të rëndë automobilistik në Nigeri, ku humbën jetën dy miqtë e tij të ngushtë.

Sipas tyre, Joshua ndodhet në gjendje stabile në Spitalin Ndërkombëtar Duchess në Lagos dhe po qëndron nën mbikëqyrje mjekësore.

Nëna e tij ka qenë pranë tij, ndërsa pjesa tjetër e familjes ende nuk është lejuar ta vizitojë, për shkak të protokolleve të sigurisë dhe shëndetësore.

Familjarët kanë bërë të ditur se aksidenti ka tronditur thellë gjithë familjen, duke e cilësuar humbjen e dy miqve të Joshua si një tragjedi të madhe jo vetëm personale, por edhe më të gjerë. Ata kanë theksuar se mendimet dhe lutjet e tyre janë me familjet e viktimave, duke shpresuar njëkohësisht në rikuperimin e plotë të boksierit.