Një familje kosovare me tre fëmijë u shpëtua më 18 mars 2026 pasi mbeti e bllokuar nga bora në zonën neutrale të kufirit Kosovë–Mal i Zi, në rrugën Kullë–Rozhajë. Shërbimi i Kërkim Shpëtimit Malor i Kosovës (ShKShMK) iu përgjigj thirrjes së Policisë Rajonale të Pejës dhe evakuoi familjen drejt zonës së sigurt në Pikën Kufitare Kullë.

Gjatë operacionit, ekipet e ShKShMK përdorën pajisje specialistike, përfshirë motosajë, dhe vlerësuan gjendjen shëndetësore të të bllokuarve para se t’i transportonin në siguri. Përveç familjes, ndihmë iu ofrua edhe një shoferi kamioni, i cili u dorëzua më pas autoriteteve malazeze.

Operacioni u realizua në bashkëpunim të ngushtë me Policinë e Kosovës dhe Zjarrfikësit e Pejës. ShKShMK apelon për kujdes të shtuar gjatë lëvizjes në rrugët malore, pasi kushtet e borës mund të krijojnë rreziqe edhe në prag të pranverës. /Gazeta Express

Njoftimi i plotë:

Familja e bllokuar nga bora shpëtohet në zonën neutrale të kufirit Kosovë–Mal i Zi

Më datën 18.03.2026, Shërbimi i Kërkim Shpëtimit Malor i Kosovës (ShKShMK)

ka pranuar një thirrje për ndihmë nga Policia Rajonale e Pejës.

Si pasojë e reshjeve të dendura të borës, rruga rajonale Kullë–Rozhajë ishte bllokuar. Në veçanti, segmenti përkatësisht zona neutrale në mes të Republikës së Kosovës dhe Malit të Zi kishte qenë tërësisht e pakaluar, duke bërë që shumë udhëtarë të mbeten të bllokuar me automjetet e tyre.

Një familje kosovare me tre fëmijë kishte kërkuar ndihmë, pasi kishte mbetur për disa orë në mes të stuhisë së borës.

Menjëherë pas pranimit të thirrjes emergjente, një ekip i ShKShMK-së nga stacioni i Pejës është nisur drejt vendit të ngjarjes me personel dhe pajisje specialistike të shpëtimit malor, duke përfshirë edhe një motosajë.

Më të arritur tek familja e cila ishte bllokuar në borë, teknikët e shpëtimit kanë bërë vlerësimin e gjendjes së tyre shëndetësore dhe më pas kanë realizuar evakuimin e tyre deri në zonën e sigurt, në Pikën Kufitare Kullë.

Përveç familjes së lartpërmendur, ndihmë u është ofruar edhe personave të tjerë të bllokuar në zonë.Po ashtu, është evakuuar edhe një shofer kamioni, i cili kishte mbetur i bllokuar në të njëjtin lokacion dhe gjendja e tij shëndetësore ishte përkeqësuar. Ai është dërguar drejt kufirit me Malin e Zi dhe i është dorëzuar autoriteteve malazeze, pasi ishte shtetas i këtij shteti.

Ky operacion është realizuar në bashkëpunim të ngushtë me Policinë e Kosovës dhe Zjarrfikësit e Pejës.

ShKShMK apelon për kujdes të shtuar gjatë lëvizjes në segmentet rrugore që përshkojnë zonat malore. Edhe pse ndodhemi në prag të pranverës, këto zona mund të sjellin ende kushte të papritura dhe sfiduese.