Anëtarët e kryesisë së LDK-së kanë vizituar familjen e ish-presidentit Ibrahim Rugova me rastin e 75-vjetorit të ditëlindjes së tij.
Gruaja e presidentit, Fana Rugova, deklaroi se presidentit Rugova ka dashur që LDK-ja të jetë gjithmonë bashkë e faqebardhë.
“Faleminderit që na vizituat në ditëlindjen e tij. Ai sot mbush 75 vjet. Ka dashur presidenti të jemi gjithmonë bashkë e faqebardhë. Më vjen mirë që partia e tij po vazhdon ritmin e tij. Faleminderit shumë që keni ardhur”, tha ajo.
Kurse, Vjosa Osmani tha se LDK-ja po rritet dhe po përcillet edhe te gjeneratat e reja.
“Jemi krenarë dhe faleminderit që keni qenë pranë nesh. Shpresojmë që tash e tutje të vazhdojmë që këtë mesazh të kultivimit të vazhdojmë edhe më tutje. Ne si gjenerata më të reja po punojmë dhe LDK-ja po zhvillohet dhe po ripërtërihet”, tha Osmani, raporton EO.
Edhe Melihate Termkolli vizitoi familjen e presidentit Ibrahim Rugova pas daljes së anëtarëve të kryesisë dhe aktivistëve.
Anëtarë të kryesisë së LDK-së, por edhe qytetarë të shumtë kanë bërë homazhe te varri i Presidentit Rugova.
