Fanella që Kobe Bryant kishte veshur në debutimin e tij me Los Angeles Lakers në vitin 1996 është shitur në ankand për 7 milionë dollarë.

Fanella, e cila u përdor gjatë sezonit të tij të parë 1996-1997, është bërë tashmë fanella e katërt më e shtrenjtë sportive e përdorur ndonjëherë në një ndeshje.

Amerikani e kaloi të gjithë karrierën e tij me Lakers, duke fituar pesë herë titullin e NBA-së dhe duke u shpallur Lojtari më i Vlefshëm (MVP) në vitin 2008.

Kjo fanellë ishte shitur për herë të parë në vitin 2013 për vetëm 115,242 dollarë, shtatë vite para se Bryant dhe vajza e tij Gianna të ndërronin jetë tragjikisht në një aksident me helikopter.

"Debutimet janë momente të vërteta të papërsëritshme në karrierën e një sportisti," tha Brahm Wachter, kreu i koleksioneve moderne në shtëpinë e ankandeve Sotheby's.

Fanella më e shtrenjtë e përdorur ndonjëherë në një ndeshje mbetet ajo e legjendës Babe Ruth, e quajtur "called shot", e cila u shit për 24 milionë dollarë në gusht.