Hysamedin Feraj nga Lëvizja Vetëvendosje thotë se aktgjykimi i djeshëm i Gjykatës Kushtetuese nuk e ka zgjidhur krizën. Madje sipas tij, "ndoshta as nuk mund ta zgjidhë ndonjëherë".

Feraj thotë se vetë Kushtetuta e Kosovës është me "difekte".

"Gjykata Kushtetuese e Kosovës e paska shty për më vonë krizën që supozohej ta zgjidhë tani. Ndoshta as nuk mund ta zgjidhë ndonjëherë, sepse vetë kushtetuta është me difekte. Dhe sado zgjedhje të bëhen, opozita, çdo opozitë, mund ta bllokojë shtetin, pavarësisht rezultatit të zgjedhjeve", shkroi ai në një postim në Facebook.

"Nuk ka shoqëri demokratike vetëm me ligj, pa kulturë demokratike. "Në një shoqëri ëngjujsh nuk ka nevojë për ligje, në një shoqëri djajsh nuk funksionon asnjë ligj". Aty ku sundon ligji i pazarit mes liderëve, nuk funksion ligji i zgjedhjeve. Aty ku vlerë sipërore politike konsiderohet "shkathtësia negociuese", domethënë "tregtuese" e liderëve, s'ka nevojë të bëhen zgjedhje: thjesht takohen diku liderët e partive dhe arrijnë kompromise, domethënë pajtohen për ndarjen e posteve", shtoi Feraj.

Ai thotë se "Gjykata ua ka kujtuar liderëve se dita e pazarit ka fund dhe çështjen ia ka lënë 'aksham pazarit'".

"Nëse as në "aksham" nuk pajtohen në pazar, shkohet në zgjedhje. Dhe kështu fillon "sbahi" tjetër i pazarit deri në "aksham", dhe mbas saj tjetra, dhe tjetra, në ciklin e pafund kozmik ndërmjet "sabahit" dhe "akshamit"", shkroi ai.

Sipas Ferajt, gjykata që është autoriteti përfundimtar për interpretimin e Kushtetutës, po synon ta rrënjosë një kulturë politike "të të bërit pazar".

""Vdekje zgjedhjeve, rroftë pazari!". Kjo është kultura politike që po synohet të rrënjoset, me shumë presion psikologjik, te qytetarët, t'i bindin se vlerë demokratike dhe virtyt sipëror është "shkathtësia e liderit për pazar". Kështu, hap mbas hapi, tregu i lirë i posteve politike mbyt demokracinë. Demokracia, si parim politik i të mirës dhe interesit të përgjithshëm zëvendësohet nga tregu, si parim i realizimin të interesit të përveçëm, privat. E gjitha, vetëm sepse opozita nuk respekton opozitën, e konsideron të padenjë (në fakt të palaverdi private) me qenë opozitë demokratike", shkroi ai.

Gjykata Kushtetuese ka vendosur të mërkurën që Presidenti të zgjidhet në një afat prej 34 ditësh, duke thënë se dekreti i presidentes Vjosa Osmani për ta shpërndarë Kuvendin nuk ka efekt juridik.

Kurti dhe partia e tij, thanë në kërkesën e tyre dërguar Kushtetueses se Gjykata do të duhej t’u lejonte që ta “vazhdojnë afatin 60-ditor” për ta zgjedhur Presidentin.

Gjykata tha se afati për zgjedhjen e Presidentit të ri jo më vonë se 30 ditë para se t’i përfundojë mandati Presidentit aktual, “është detyrues dhe përfundimtar, dhe se marrë për bazë karakterin detyrues të këtij afati, i njëjti nuk mund të relativizohet”.

Në kontekstin konkret – meqenëse Kuvendi nuk ka qenë i konstituuar 60 ditë para afatit kushtetues për zgjedhjen e Presidentit, pra nuk i ka pasur në dispozicion 60 ditët prej kur duhej të fillonte procedura – Kushtetuesja vendosi që ta llogarisë nisjen e këtij afati prej ditës kur u konstituua Kuvendi – pra, prej 11 shkurtit.

Vetë Kurti nuk ka folur ende për aktgjykimin.