Ish-trajneri legjendar i Manchester United, Sir Alex Ferguson, ka habitur publikun me deklaratën e tij kur u pyet se kush është trajneri më i madh i të gjitha kohërave. Edhe pse vetë konsiderohet gjerësisht si më i miri në historinë e Premier League, Ferguson ka vënë mbi vete një tjetër emër legjendar: Jock Stein.

Në një intervistë të dhënë për Federatën Skoceze të Futbollit, Ferguson kujtoi me mall kohët kur punonte si ndihmës i Stein, përpara se ta zëvendësonte pas vdekjes së papritur të tij në vitin 1985, gjatë një ndeshjeje mes Skocisë dhe Uellsit.

“Ishte unik dhe ishte një privilegj i madh për mua që punova me të. Më dha peshë në karrierën time që mund të thosha se kam punuar me Jock Stein,” deklaroi Ferguson. Ai e përshkroi Stein si njeri me “prani të jashtëzakonshme”, që “mbushte çdo dhomë ku hynte” dhe ishte një mjeshtër i komunikimit dhe marrëdhënieve me mediat.

Jock Stein është më së shumti i njohur për triumfin e tij me Celtic në Kupën e Evropës në vitin 1967, kur ai udhëhoqi ekipin e njohur si “Lisbon Lions” drejt një fitoreje historike ndaj Interit. Ai ishte trajneri i parë britanik që fitoi trofeun më të madh evropian për klube dhe mbetet një figurë ikonike në futbollin skocez dhe evropian.

Ferguson, i cili vetë fitoi 13 tituj të Premier League dhe dy Liga të Kampionëve me Manchester United, e konsideroi përvojën me Stein si një shkollë të vërtetë për karrierën e tij. Ai kujtoi se si qëndronin deri në orët e para të mëngjesit duke folur për futboll dhe se Stein kurrë nuk merrte meritën për arritjet e tij.

“Ishte e mrekullueshme të dëgjoja një njeri që kishte arritur aq shumë, të ishte kaq i përulur. Kjo më ndihmoi jashtëzakonisht si trajner i ri,” shtoi Ferguson.

Në një kohë kur emra si Pep Guardiola, Carlo Ancelotti, Johan Cruyff apo Bob Paisley shpesh përmenden në debatin për trajnerin më të madh të historisë, për Fergusonin përgjigjja është e qartë dhe me ndjenja të thella personale: Jock Stein – mentori dhe frymëzimi i tij.