E ardhmja e Fermín López është pezull vetëm pak orë para se merkatoja të mbyllet. Mesfushori andaluzian, i formuar në La Masia të FC Barcelonës, po përballet me një dilemë personale dhe profesionale që mund të ndikojë në gjithë pjesën tjetër të karrierës së tij.

Chelsea ka hyrë fuqishëm në negociata dhe është i gatshëm të bëjë një përpjekje financiare të jashtëzakonshme për ta bindur lojtarin të largohet nga FC Barcelona, klubi i jetës së tij.

Sipas Sport, skuadra londineze ka paraqitur një ofertë që tejkalon ndjeshëm pagën aktuale të lojtarit. Tek Barça ai fiton rreth 6 milionë euro bruto në vit, ndërsa në Stamford Bridge i kanë ofruar 15 milionë. Një shumë që pothuajse trefishon pagën e tij aktuale dhe do ta bënte njërin nga lojtarët më të paguar në Premier League.

Propozimi nuk ka të bëjë vetëm me aspektin financiar. Trajneri i ri i “bluve”, Enzo Maresca, ka zhvilluar biseda të drejtpërdrejta me lojtarin për t’i shpjeguar rolin që do të kishte në projekt. Në Londër, ai do të vinte si një pjesë kyçe, me minuta të garantuara dhe statusin e një ylli në ligën angleze. Kjo bie në kontrast me situatën e tij në Camp Nou, ku, pavarësisht se vlerësohet nga Hansi Flick, ende nuk ka një vend fiks në formacionin titullar.

Një shembull i kësaj u pa në ndeshjen e fundit të kampionatit, ku Fermín nuk luajti asnjë minutë, megjithëse rezultati ishte kundër dhe profili i tij ofensiv mund të kishte qenë vendimtar. Ky vendim e preku emocionalisht lojtarin dhe vetë Flick u përpoq ta ngushëllonte në stol. Trajneri gjerman, në një konferencë për shtyp, ka përsëritur se nuk dëshiron të ndahet me asnjërin nga premtimet e reja, por presioni i Chelseat e ndryshon krejtësisht skenarin.

Oferta londineze përfshin gjithashtu një shumë prej afro 58 milionë eurosh për transferimin. Barcelona, e vetëdijshme për rëndësinë e Fermín-it në projektin e saj të ardhshëm, ka reaguar duke ngritur çmimin në 70 milionë. Drejtori sportiv, Deco, synon të maksimalizojë negociatën, megjithëse diferenca e madhe në pagë bën që vendimi përfundimtar të varet kryesisht nga vetë lojtari.

Mesfushori po shijonte disa ditë pushimi në Ishujt Balearikë kur mori lajmin. Koha për të vendosur është minimale, pasi merkatoja mbyllet këtë të hënë në 23:59. Fermín gjithmonë ka shprehur dëshirën për të arritur sukses tek Barça, klubi ku u bashkua si fëmijë, por madhësia e ofertës nga Premier League e ka detyruar ta rimendojë gjithçka.

Gjatë verës kishte ekipe të interesuara për ta marrë, si Manchester United, por lojtari e refuzoi atë rrugë sepse dëshironte të qëndronte në Camp Nou. Tani, me ofertën shumë-milionëshe të Chelseat, historia ka marrë një kthesë drastike.

Nëse pranon, Fermín do të zbarkonte në një ekip që është kampioni aktual i Botës për Klube dhe që po rindërton projektin e tij me talente të reja. Atje do të kishte mundësinë të rritej në një ligë shumë konkurruese dhe me sigurinë se do të ishte lojtar vendimtar.

Nga ana tjetër, qëndrimi në Barcelonë do të nënkuptonte vazhdimin e luftës për t’u afirmuar si titullar, duke mbrojtur ngjyrat e klubit që e formoi dhe me ëndrrën për të arritur sukses në klubin e jetës së tij. Një dilemë që pasqyron atë me të cilën janë përballur shumë lojtarë të La Masias në të kaluarën: zemra kundrejt ambicies sportive dhe ekonomike.

Në zyrat e Camp Nou, orët e ardhshme do të jenë intensive. Ndërsa dukej se lëvizjet kryesore do të ishin largimet dytësore, si huazimi i Iñaki Peña te Elche, ndërprerja e kontratës së Oriol Romeu, apo largimi i mundshëm i Héctor Fort te Mallorca, ofensiva e papritur e Chelseat e ka ndryshuar plotësisht panoramën e merkatos.

Barça nuk donte të ndahej me asnjërën nga xhevahirët e saj, por nëse Fermín vendos të pranojë sfidën angleze dhe klubi londinez qëndron i palëkundur në propozimin e tij, transferimi mund të bëhet i pashmangshëm.

Ora po ecën dhe numërimi mbrapsht ka nisur: a do të vazhdojë Fermín López të ndjekë ëndrrën e tij në Camp Nou apo do të bëjë një hap drejt së panjohurës drejt Stamford Bridge me një kontratë galaktike në dorë? Përgjigjja do të vijë vetëm pas pak orësh./GazetaExpress/