Pas disfatës së sotshme kundër Llapit, Feronikeli ka bërë të ditur se i ka ndarë rrugët me trajnerin Agim Sopi dhe menaxherin Albert Bunjaki.
Vetëm pak orë pas disfatës me rezultat 2:1 kundër Llapit në Podujevë, në ndeshjen e vlefshme për xhiron e 19-të të këtij sezoni të Superligës së Kosovës, Feronikeli ka bërë të ditur se është vendosur të ndahen rrugët me Albert Bunjakin dhe Agim Sopin, raporton Gazeta Express.
Ky vendim erdhi pasi që Feronikeli, që e nisi sezonin si kampion i kampionatit dhe Kupës së Kosovës, po gjendet në një situatë të vështirë, ku me pikë është më afër zonës për të rënë nga Superliga sesa për ta fituar titullin e kampionit.
“Me një marrëveshje të dyanshme dhe pas një takimi krejtësisht miqësor, u vendos që të ndahen rrugët mes dyshes Bunjaku dhe Sopi, me klubin e Feronikelit”, thuhet në njoftimin e publikuar nga Feronikeli.
“Klubi i futbollit Feronikeli, i uron shumë suksese z. Bunjakut dhe z. Sopi në hapat e tyre të mëtutjeshëm dhe i falënderon për korrektësinë dhe profesionalizmin e treguar gjatë kohës sa ishin në klub”
“Për detaje të reja, do të njoftojmë me kohë opinionin”. /Gazeta Express/
