Karriera e saj nisi në moshë të vogël, kur u shfaq në projekte televizive të Disney Channel, ku fitoi famë me serialin “Shake It Up”
Zendaya Coleman feston sot ditëlindjen e saj të 29. Artistja e njohur, lindur më 1 shtator 1996 në Oakland, Kaliforni, ka arritur të bëhet një nga figurat më të dashura e më të respektuara të Hollywood-it dhe botës së modës.
Karriera e saj nisi në moshë të vogël, kur u shfaq në projekte televizive të Disney Channel, ku fitoi famë me serialin “Shake It Up”. Ky ishte vetëm fillimi i një rruge që do ta çonte drejt suksesit ndërkombëtar. Shumë shpejt, Zendaya do të spikaste si aktore, këngëtare dhe modele, duke u shndërruar në një emër që nuk kalon pa u vënë re.
Një nga rolet që e vendosi përfundimisht në qendër të vëmendjes është ai i Rue në serialin “Euphoria”, për të cilin ajo fitoi dy herë çmimin Emmy, duke u bërë një nga aktoret më të reja në histori që merr një vlerësim të tillë. Përveç televizionit, Zendaya është pjesë edhe e sagës së filmave të Marvel si partnerja e Spider-Man, ku ka fituar një bazë fansash edhe më të madhe.
Përtej ekranit, Zendaya është një ikonë stili e njohur për paraqitjet e saj të guximshme dhe elegante në tapetet e kuq, duke bashkëpunuar me stilistët më të mëdhenj botërorë. Sot, në ditën e saj të lindjes, ajo mbetet një nga figurat më frymëzuese të brezit të saj, duke treguar se talenti, puna dhe origjinaliteti shpërblehen gjithmonë.
