Shkruan: Baton Haxhiu

Reagim ndaj letrave identike të klubeve të futbollit:

Të dashur klube të futbollit të Kosovës,

Është gjithmonë emocionuese kur sheh një shembull të harmonisë perfekte, ku 12 klube, si një kor i sinkronizuar deri në perfeksion, përdorin të njëjtën letër për të mbrojtur Federatën e Futbollit. Do të thoshim se kjo është një shfaqje e rrallë e solidaritetit – por fatkeqësisht, jo për arsyet që do të donim të besonim.

Kur fjalët e secilit klub janë copy-paste si ushtarë të bindur që marrin urdhra nga lart, duket qartë që nënshtrimi është shndërruar në një formë arti. Si në mesjetë, ku feudalët mbanin kontroll të plotë mbi vasalët e tyre, edhe këtu, kryetari i Federatës duket se ka tërhequr fijet dhe klubet, si kukulla pa zë, kanë ndjekur në rresht.

Përpjekja për të përdorur fjalë të mëdha si “miliona euro investime” tingëllon bukur, por le të jemi të sinqertë: nuk mund të mbushësh stadiume të shpërfytyruara dhe fusha gjysmë të prishura me investime të imagjinuara. Dhe pastaj të flasim për "sakrifica" – po, sakrifica, ashtu siç sakrifikon një pallat të ndritshëm për t’u bindur një mbreti të korruptuar.

Ah, dhe sa për pjesën e "përlyerjes së punës së madhe," le të ndalemi një moment. Po, përlyerja është e pashmangshme kur llumi i korrupsionit qëndron mbi sipërfaqen e çdo veprimi të Federatës. Mbase dikush duhet të mbajë një fshesë të madhe, sepse nuk është kritika që e përlyen futbollin, por ata që mbyllin sytë përpara së vërtetës.

Por, të dashur klube, le t'ju tregojmë ku qëndron realisht problemi. Sepse nëse vërtet jeni aq të pavarur dhe të guximshëm sa pretendoni, do të kishit reaguar ndryshe. E vërteta është që ju jeni vetëm figura pas të cilave fshihet dikush tjetër. Dhe të gjithë e dimë se nga vijnë këto letra identike: nga një telefonatë apo mesazh i "zëshëm," por pa mendim. Dëgjoni gjithmonë atë zë në kufje, apo jo? Një zë që ju udhëzon çfarë të thoni dhe si ta thoni. E pra, zëri është i fortë, por mendimi mungon.

Në fakt, nuk është hera e parë që shohim njerëz që kanë dëshirën e sintaksës, dhe bëjne spikerin çdo ditë, por nuk dinë si të shkruajnë një mendim të vetin. Kjo është arsyeja pse letrat tuaja, përveçse të njejta, janë edhe të thata, të mbytura nga ajo që mund të quajmë "skllavëri mendimi". Do të sugjeroja që, në vend që të vazhdoni këtë farsë të nënshtruar, të dërgoni dikë tjetër në publik për të bërë debat. Do të ishte më interesante se një zë pa mendim që shkruan për ju.

Për të mos e zgjatur më, po ju tregoj edhe disa pika ku ndoshta do ta kuptoni se ku qëndron realisht problemi:

1. Mentaliteti Feudal dhe Nënshtrimi

Duhet të kritikohet nënshtrimi i klubeve ndaj federatës. Kjo është një formë feudale e kontrollit, ku presidenti i Federatës përdor presionin financiar për të mbajtur nën vete klubet që, në vend se të flasin hapur për problemet, i bashkohen një zëri të detyruar mbrojtjeje.

2.  Mungesa e Guximit të Klubeve

Letra e Ballkanit dhe letrat identike nga klubet e tjera, tregojnë mungesën e guximit të drejtuesve të futbollit për t'u përballur me të vërtetën. Ky lloj nënshtrimi pengon zhvillimin dhe profesionalizmin, pasi çdo kritikë trajtohet si sulm personal, në vend që të shihet si mundësi për përmirësim.

3. Investimet dhe Rezultatet

Edhe pse Ballkani pretendon se investon miliona euro, këto investime mbesin të pakuptimta nëse federata mbetet e kapur nga korrupsioni dhe interesat personale. Arritjet e klubeve nuk mund të jenë një mburojë për të heshtur ata që kërkojnë përgjegjësi dhe transparencë.

4. Përpjekja për të Heshtur Opinionin Publik

Letra tregon përpjekjen për të diskredituar kritikët duke i paraqitur ata si jo-profesionistë. Kjo është një taktikë e ulët për të shmangur ballafaqimin me problemet reale.

Në fund, një këshillë për ju, të dashur klube: kur të shkruani letra të tjera, mos lini që t’jua shkruajë dikush që ka zë, por jo mendim. Ndoshta dikush që, përveç dëshirës për të lexuar nga kufjet telefonike, ka edhe aftësinë për të menduar përtej urdhrave.

Sepse, po e mbyll me një sugjerim të vogël: për herën tjetër, bëni një debat publik me mua. Kështu, ndoshta do të mësoni se, edhe nëse flisni nga një zë i fortë, është mendimi që bën dallimin. Dhe nuk po shoh se keni mendim. Edhe per keto arsye;

Sepse 12 Klube Falin Feudalizmin për një Këngë të Sinkronizuar”

Sepse beni Këndim Feudal dhe 12 Klube I Bashkohen  Korit të Nënshtruar

Sepse ne Futboll Feudal Zëri i 12 Klubeve Është Vetëm një Repetim i Urdhrave

Sepse keni Nënshtrim te Sinkronizuar:

Sepse 12 Klube që Flasin Me Zë, Por Pa Mend

Kaq kete here.