Federata Shqiptare e Futbollit gjobitet me 161,500 franga dhe humbet 20% të kapacitetit për ndeshjen e radhës në shtëpi

Federata Shqiptare e Futbollit (FSHF) është njoftuar zyrtarisht nga FIFA për një vendim disiplinor të ashpër, pas ndeshjes mes Shqipërisë dhe Serbisë, e vlefshme për kualifikueset e Kampionatit Botëror.

Sipas njoftimit të FSHF-së, FIFA ka vendosur ta dënojë Shqipërinë me një gjobë prej 161,500 franga zvicerane, ndërsa ndeshja e radhës në shtëpi, ndaj Letonisë, do të zhvillohet me të paktën 20% të kapacitetit të stadiumit të mbyllur për publikun.

Shkaku: Sjellje të përsëritura të tifozëve

Dënimi vjen si rezultat i sjelljeve të përsëritura dhe të papërshtatshme të një pjese të tifozëve shqiptarë, të cilët, sipas FIFA-s, kanë kryer veprime që bien ndesh me rregulloret ndërkombëtare të etikës sportive.

Në dosjen e FIFA-s përmenden disa shkelje të rënda: Këngë me përmbajtje diskriminuese, hedhje objektesh në fushë, ndezje fishekzjarrësh dhe flakadanësh, gjeste dhe mesazhe të papërshtatshme, ndërprerje gjatë himneve kombëtare.

FSHF: “Penalizim serioz për gjithë komunitetin futbollistik”

Në reagimin e saj, FSHF e konsideron këtë vendim një penalizim serioz, që nuk dëmton vetëm Federatën në aspektin financiar dhe organizativ, por mbi të gjitha godet Kombëtaren shqiptare, e cila rrezikon mbështetjen e plotë të tifozëve në ndeshjen e radhës.

"FSHF u bën thirrje të gjithë tifozëve të Kombëtares që të shmangin çdo veprim që mund të dëmtojë skuadrën tonë, të respektojnë rregullat ndërkombëtare dhe të kontribuojnë për një atmosferë dinjitoze në mbështetje të Shqipërisë", thuhet në deklaratë.

Thirrje për vetëpërmbajtje dhe unitet

Në përmbyllje, FSHF thekson se mbështetja ndaj Kombëtares duhet të jetë e përgjegjshme, në mënyrë që të shmangen sanksione të tjera që mund të ndikojnë negativisht në ecurinë e kuqezinjve.

“Vetëm të bashkuar dhe të përgjegjshëm mund ta mbështesim Kombëtaren siç ajo e meriton”, përfundon apeli i Federatës. /GazetaExpress/