Fituesit e EURO 2024 morën një shtysë të madhe pas kërcënimit për bojkot.

FIFA ka njoftuar sot për ranglistën e saj dhe ajo që bie në sy është Spanja, , pasi vendi kishte kërcënuar se do të bojkotonte Kupën e Botës 2026.

Organi drejtues i futbollit botëror publikoi sot renditjen e përditësuar të kombëtareve të meshkujve, ku Spanja është ngjitur në vendin e parë.

Skuadra e Luis de la Fuente ka impresionuar në ndeshjet kualifikuese të fundit për Kupën e Botës, duke mposhtur Bullgarinë dhe më pas duke turpëruar Turqinë me rezultat 6-0. Fituesit e EURO 2024 janë shpërblyer me njohjen si skuadra më e mirë në botë aktualisht.

Argjentina, që më herët mbante vendin e parë, ka rënë në pozitën e tretë pas humbjes së fundit kundër Ekuadorit. Megjithë këtë pengesë, kampionët e botës kanë dominuar kualifikueset e Amerikës së Jugut, teksa përgatiten për turneun e fundit ndërkombëtar të Lionel Messit verën e ardhshme.

Franca ka ngjitur një vend në renditje, duke kaluar nga e treta në të dytën, dhe ekipi i Didier Deschamps do të jetë sërish ndër favoritët për trofe. Anglia, me një rekord perfekt prej pesë fitoreve në pesë ndeshje kualifikuese, mbetet në vendin e katërt.

Pse kërcënoi Spanja me bojkot të Kupës së Botës?

Zyrtarë të qeverisë spanjolle paralajmëruan se do të tërhiqeshin nga Botërori i verës së ardhshme nëse Izraeli kualifikohet për turne.

Izraeli ndodhet aktualisht në vendin e tretë në grup me nëntë pikë nga pesë ndeshje, pas Norvegjisë dhe Italisë. Me sfidat në transferte ndaj Norvegjisë dhe Italisë në tetor, ata mund të përfundojnë të dytët dhe potencialisht të sigurojnë një vend në play-off, varësisht nga rezultatet.

Kryeministri spanjoll Pedro Sánchez ka kërkuar përjashtimin e Izraelit nga garat sportive.

Ai tha: “Izraeli nuk mund të vazhdojë të përdorë asnjë platformë ndërkombëtare për të larë imazhin e tij.”

Një komision hetimor i OKB-së së fundmi deklaroi se ka baza për të besuar se katër nga pesë aktet gjenocidale sipas së drejtës ndërkombëtare janë kryer nga Izraeli në Gaza. Ministria e Jashtme e Izraelit reagoi duke e cilësuar raportin si “të shtrembëruar dhe të rremë”.

Sipas Ministrisë së Shëndetësisë në Gaza, mbi 65,000 persona janë vrarë në Gaza.

Cili është ndalimi i UEFA-s ndaj Rusisë?

Shumë figura në botën e sportit kanë bërë thirrje që Izraeli të ndalohet nga futbolli ndërkombëtar, në mënyrë të ngjashme me Rusinë. Pas pushtimit të Ukrainës nga Rusia në shkurt 2022, UEFA dhe FIFA pezulluan kombëtaren dhe klubet ruse nga të gjitha garat.

Rusia e apeloi ndalimin, por ai u refuzua.

Paraqitja e fundit e tyre në një kompeticion global ishte Botërori 2018, pasi iu ndalua pjesëmarrja në Kupën e Botës 2022 dhe në turneun e ardhshëm verën e ardhshme. Presidenti i UEFA-s, Aleksander Ceferin, ka folur për ndalimin në fuqi, duke shprehur keqardhje për atletët.

Ai tha: “Ndalimi për skuadrat ruse është, mendoj, tre vjet e gjysmë. A u ndal lufta? Jo. Pra, për momentin, nuk e di.

“Duhet të them se me situatën në Rusi dhe Ukrainë, kishte një presion shumë të madh politik. Tani është më shumë një presion i shoqërisë civile sesa i politikanëve, sepse politikanët, kur bëhet fjalë për luftëra dhe viktima, janë shumë pragmatikë. Nuk mund të them çfarë do të ndodhë. Ka bisedime për gjithçka, por unë personalisht jam kundër përjashtimit të atletëve.” /GazetaExpress/