FIFA ka njoftuar planet për të përdorur VAR për të kontrolluar dhënien e goditjeve këndi gjatë Botërorit 2026, që do të zhvillohet në SHBA, Kanada dhe Meksikë.

Ky ndryshim vjen pavarësisht refuzimit të ligave vendase për ta përdorur këtë sistem në ndeshjet e tyre, ku shqetësimet kryesore lidhen me vonesat dhe mungesën e resurseve.

Ndërhyrja do të bëhet vetëm gjatë Botërorit, ku FIFA ka mjaft kamera dhe teknologji të topit për të marrë vendime të shpejta dhe të sakta.

Ky është një hap i ri në protokollin e VAR, i cili aktualisht përdoret vetëm për golat, penalltitë, kartonët e kuq dhe rastet e identitetit të gabuar të lojtarëve.

FIFA do të kontrollojë çdo goditje këndi gjatë lojës, edhe pse shumica e vendimeve do të jenë të qarta. Kjo masë vjen pas gabimeve të shpeshta nga goditjet këndi, të cilat kanë ndikuar në rezultate, siç ndodhi me dy gola të Nottingham Forest këtë sezon.

Ligat vendase, nga ana tjetër, nuk mund ta zbatojnë këtë sistem lehtësisht, pasi numri i goditjeve të këndit është shumë më i madh sesa i kartonëve të kuq, dhe resurset janë të kufizuara në nivele më të ulëta të futbollit. /GazetaExpress