Bashkimi po vazhdon në formë të lartë, ku fitoi si mysafir ndaj Golden Eagle Yllit me shifrat 60:70 (11:21, 13:12, 20:18, 16:19), në javën e 19-të të Superligës.

Prizrenasit të motivuar e nisën ndeshjen për mrekulli me seri 0:8, e më pas ngritën epërsinë në 7:20, për të fituar çerekun e parë 11:21. Epërsia e mysafirëve u ngrit deri në 16 pikë, 17:33, por shtatë pikë radhazi nga vendasit bën që pjesa e parë të përfundojë 24:33.

Në periudhën e tretë, therandasit ngushtuan shifrat në 43:49, derisa rezultati pas 30 minutash ishte 44:51. Por, në dhjetë minutat e fundit, prizrenasit u shkëputën deri në 17 pikë, 51:68, derisa triumfuan në fund 60:70.

Më i dalluari te vendasit ishte Malcolm Armstead me 22 pikë e katër kërcime, ndërsa te mysafirët më i miri ishte Jayveous Mckinnis me 19 pikë e 20 kërcime.

Golden Eagle Ylli ka tetë fitore e 11 humbje, kurse Bashkimi në vendin e parë ka 14 fitore e pesë humbje.