PSG ka hyrë në histori të Ligës së Kampionëve pasi mposhti Inter Milanin me rezultatin e thellë 5-0 të shtunën, fitorja më e madhe ndonjëherë në një finale të kësaj gare prestigjioze.

Edhe pse nuk është hera e parë që një skuadër fiton finalen me diferencë të theksuar, paraqitja e parisienëve qëndron mbi të gjitha.

Asgjë nuk shkoi mirë për Interin, ndërsa për PSG-në gjithçka funksionoi në mënyrë perfekte në rrugën drejt titullit të tyre të parë në Ligën e Kampionëve.

Desire Doue, 19-vjeçar, dha një paraqitje spektakolare në Mynih, duke asistuar për golin e parë të Achraf Hakimit dhe më pas duke realizuar dy gola vetë. Khvicha Kvaratskhelia dhe Senny Mayulu e vulosën fitoren me golat e tyre në fundin e ndeshjes.

Fitoret më të thella në finalet e Ligës së Kampionëve:

AC Milan 4-0 Barcelona (1993/94)

Skuadra “Dream Team” e Johan Cruyff ishte një prej më të mirave për t’u parë, por u shkatërrua në mënyrë të pamëshirshme nga AC Milan i Fabio Capellos në finalen e vitit 1994.

Edhe pse me mungesa të rëndësishme, Milan e mbylli pjesën e parë me dy gola të Daniele Massaros, ndërsa në pjesën e dytë Dejan Savićević dhe Marcel Desailly vulosën një fitore historike. Deri këtë sezon, ishte fitorja më e thellë me katër gola në një finale.

Real Madrid 4-1 Juventus (2016/17)

Zinedine Zidane drejtoi Real Madridin drejt titullit të 12-të në Ligën e Kampionëve, duke u bërë ekipi i parë që mbron titullin pas rikonstruktimit të garës në vitin 1992.

Ronaldo shënoi dy herë, Casemiro riktheu avantazhin pas barazimit të Mandzukic, ndërsa Asensio shënoi golin e katërt në minutën e fundit.

Real Madrid 4-1 Atlético Madrid (2013/14)

Atletico ishte shumë pranë fitores së parë në Champions, por Sergio Ramos barazoi me një gol në minutën e 93-të, duke çuar ndeshjen në shtesë.

Aty, Real shkatërroi rivalin me gola nga Bale, Marcelo dhe Ronaldo, duke siguruar “La Decima”.

FC Porto 3-0 Monaco (2003/04)

Jose Mourinho fitoi titullin e tij të parë të madh me Porton në vitin 2004, një vit pas fitores në Kupën UEFA.

Në finale, Porto dominoi ndaj Monacos me gola nga Carlos Alberto, Deco dhe Dmitri Alenichev. Kjo fitore i hapi rrugë Mourinho-s drejt majave të futbollit evropian.

Real Madrid 3-0 Valencia (1999/2000)

Finalja e parë mes dy skuadrave nga e njëjta ligë u fitua bindshëm nga Real Madridi, pavarësisht një sezoni të dobët në La Liga.

Morientes dhe McManaman shënuan në pjesën e parë, ndërsa Raul e vulosi fitoren në fund, duke siguruar titullin e tetë evropian për “Los Blancos”.

Fitorja 5-0 e PSG-së ndaj Interit tashmë shkruan një kapitull të ri në historinë e Ligës së Kampionëve si rezultati më i thellë ndonjëherë në një finale – një arritje madhështore për klubin nga Parisi./GazetaExpress/