Kapiteni i Inter Miami, Lionel Messi, ka nderuar shokët e tij të vjetër të skuadrës, Jordi Alba dhe Sergio Busquets, pasi i ndihmoi t’i japin fund karrierës me një trofe të fundit madhështor në finalen e Kupës së MLS të shtunën mbrëma.
Inter Miami triumfoi 3-1 ndaj Vancouver Whitecaps në Chase Stadium, duke siguruar kupën e parë të MLS në historinë e klubit, që iu bashkua ligës si skuadër e re në vitin 2020.
Ky trofe shënon titullin e 48-të në karrierën e Messit si futbollist profesionist – shumë prej të cilëve i ka fituar krah Albës dhe Busquets-it gjatë epokës së artë te Barcelona.
Skuadra e kishte shprehur qëllimin për t’i dhënë dy spanjollëve një lamtumirë të denjë pasi ata njoftuan tërheqjen nga futbolli para fillimit të plejofit.
“Është diçka speciale sepse erdhëm këtu së bashku, të tre, dhe objektivi ishte ky: të fitonim këtë titull që është shumë i rëndësishëm për rritjen e klubit,” tha Messi për ESPN.
“Jam i lumtur që ata largohen kështu, duke festuar një trofe. Janë miqtë e mi më të mirë dhe jam mirënjohës që kam ndarë pothuajse gjithë karrierën time me ta.”
Alba dhe Busquets iu bashkuan Inter Miami-t së bashku me Messin në verën e vitit 2023, duke fituar menjëherë Leagues Cup, pastaj Supporters’ Shield 2024 dhe duke vendosur rekordin e pikëve në një sezon të MLS.
Në nëntor 2024, një tjetër ish-blaugrana, Javier Mascherano, mori drejtimin e skuadrës si trajner, duke ribashkuar ish-bashkëlojtarët.
“Është gëzim i madh t’u thuhet lamtumirë dy legjendave të futbollit në mënyrën më të mirë të mundshme,” tha Mascherano. “Ata bënë histori në këtë klub dhe e transformuan plotësisht bashkë me Leon. Kanë ardhur për ta ndryshuar rrjedhën e klubit – dhe e arritën.”
Në finalen e së shtunës, Messi regjistroi dy asistime për golat e Rodrigo De Paul dhe Tadeo Allende, ndërsa një autogol i Édier Ocampo-s të Vancouver-it i dha Miami-t avantazhin e hershëm.
Pas golit të tretë që vulosi trofeun në kohën shtesë, Mascherano vrapoi në fushë për të përqafuar Alba-n për herë të fundit.
“Iu afrova Jordit sepse Busquets ishte shumë larg,” tha argjentinasi me humor. /GazetaExpress
