Pas zyrtarizimit të transferimit të tij te Sunderland, Granit Xhaka ka folur për emocionet dhe ambiciet që e kanë shtyrë t’i bashkohet ekipit të posa promovuar në Premierligë.

Mesfushori me përvojë u shpreh i entuziazmuar për kapitullin e ri në Stadium of Light.

“Jam shumë krenar që jam këtu,” tha Xhaka. “Kur fola me klubin, u emocionova dhe ndjeva energjinë dhe mentalitetin që kanë të gjithë njerëzit dhe lojtarët. Është pikërisht ajo që doja dhe kam një ndjesi shumë të mirë.”

Xhaka beson se është në momentin e duhur për të sjellë përvojën dhe cilësinë e tij në skuadër, duke theksuar rëndësinë që Sunderland të vazhdojë të ndërtojë mbi suksesin e arritur.

“Ne jemi kthyer aty ku ky klub duhet të jetë, dhe duam të qëndrojmë këtu për të shkruar historinë tonë. Ndihem i gatshëm ta ndihmoj ekipin me përvojën time, por edhe me cilësinë time. Duhet ta gjejmë veten në fushë, por nuk mendoj se kjo do të jetë një problem i madh. Ka qenë një pritje e gjatë, por tani jam këtu dhe mezi po e pres.”

Granit Xhaka do ta veshë fanellën me numrin e tij ikonik 34.