Flamengo ka triumfuar në finalen e Copa Libertadores, duke mposhtur Palmeiras 1-0 dhe duke u ngjitur në majën e futbollit të Amerikës së Jugut për herë të katërt në histori. Ky sukses e bën klubin nga Rio de Janeiro ekipin brazilian më të suksesshëm në kompeticion.
Goli i vetëm i ndeshjes erdhi në minutën e 67-të, kur qendërmbrojtësi Danilo përfitoi nga një mbulim i dobët në zonë dhe shënoi me kokë pas një krosimi të Arrascaetës. Një finalizim vendimtar në një duel të ashpër, me 33 faulle dhe shtatë kartonë të verdhë.
Fitorja e Flamengo-s shërben si hakmarrje ndaj humbjes së vitit 2021 pikërisht kundër Palmeiras. Tani klubi është në rrugë për një tripletë historike në vitin 2025, pasi ka fituar tashmë Superkupën e Brazilit dhe i duhen vetëm dy pikë nga dy ndeshjet e fundit për të siguruar titullin e kampionit në Serie A.
Ky është triumfi i tretë i Flamengo-s në Libertadores që nga viti 2019 dhe i katërti në total, duke e barazuar me Estudiantes dhe vetëm tre tituj larg rekordit të Independiente me shtatë trofe. /GazetaExpress/
