Zgjedhjet presidenciale FC Barcelona janë në zhvillim e sipër, pasi procesi i nominimeve përfundoi të enjten.
Joan Laporta, i cili kërkon të mbajë postin e presidentit, do të përballet me Victor Font në një balotazh të drejtpërdrejtë më 15 mars.
Para-kandidatët e tjerë, Xavier Vilajoana dhe Marc Ciria, nuk arritën të kalojnë pragun pas numërimit të firmave, me Ciria që mbeti 90 nënshkrime larg minimumit të kërkuar prej 2,337 për të hyrë në votimin final.
Font dhe Laporta u ndanë nga 2,786 firma gjithsej, ndërsa Laporta konsiderohet favorit i madh për të fituar zgjedhjet. Font ishte gjithashtu rivali i tij më i afërt edhe në vitin 2021.
Tani gazetari i “Sky Sports” në Gjermani, Florian Plettenberg, ka raportuar se nëse Font do të fitonte pushtetin, pozita e trajnerit Hansi Flick nuk do të ishte e sigurt.
Sipas Plettenberg, është “më se e mundur” që trajneri gjerman të vendosë të largohet këtë verë ose në vitin 2027, kur përfundon kontrata e tij, nëse ndodh një ndryshim i tillë në drejtimin e klubit.
Font ka deklaruar se do të ishte i lumtur ta mbante Flick në krye të ekipit, por se do të largohej nga drejtori aktual sportiv Deco.
Nga ana e tij, Flick ka shprehur mbështetje të tërthortë për Laportën, ndërsa një raport i tillë padyshim i shërben Laportës në publik, duke qenë se Flick është jashtëzakonisht i popullarizuar te tifozët e Barcelonës.
Gjatë prezantimit të fushatës së tij “We defend Barcelona”, Laporta i tha “Mundo Deportivo” se Victor Font është “rreziku më i madh” për projektin aktual, i cili është ndërtuar rreth emrave të Flick dhe Deco.
“Projekti ynë sportiv është me Hansi Flick në stol për pesë vitet e ardhshme dhe, nëse gjërat vazhdojnë siç kanë shkuar, ne jemi shumë të kënaqur me të. Ndjenja ime është se edhe tifozët janë shumë të lumtur me të. Pastaj është Deco në drejtimin sportiv. Duke mbajtur skuadrën që kemi, e cila është nën kontratë deri në vitin 2030, ne kemi një ekip si për të tashmen ashtu edhe për të ardhmen”, e mbylli ai./GazetaExpress/
