Real Madridi ka shumë në lojë në finalen e Superkupës së Spanjës që zhvillohet sot, dhe jo vetëm në aspektin sportiv. Përveç trofeut dhe prestigjit të El Clásicos, rezultati mund të ketë peshë edhe për të ardhmen e projektit dhe të trajnerit, ndërsa në dhomat e zhveshjes ekziston një uri e madhe për trofe pas më shumë se një viti pa titull.

Sipas raportimeve të mediave spanjolle, presidenti Florentino Pérez ka vendosur t’u japë lojtarëve një motivim shtesë për finalen ndaj Barcelonës, duke rritur bonuset financiare për fitimin e Superkupës.

Fillimisht, çdo lojtar ishte paraparë të përfitonte nga 150 mijë euro bonus për triumfin në Arabinë Saudite. Megjithatë, Pérez ka vendosur ta rrisë shumën në 200 mijë euro për lojtar, një vendim që tregon qartë sa i rëndësishëm është ky trofe për klubin madrilen.

Edhe pse paratë nuk janë motivimi kryesor për një ndeshje të këtij niveli, rritja e bonusit shihet si një shtysë shtesë për lojtarët që të japin maksimumin në fushë dhe ta fitojnë trofeun përballë rivalit të përjetshëm.

Për Real Madridin, rritja prej 50 mijë eurosh për lojtar konsiderohet e papërfillshme krahasuar me rëndësinë e El Clásicos dhe të vetë titullit.

Për më tepër, fitimi i Superkupës do t’i sillte klubit përfitime të mëdha financiare, dhe ndarja e një pjese të tyre me lojtarët shihet si një veprim i drejtë nga bordi drejtues. /GazetaExpress