Sipas “La Stampa”, prezervativët falas për garuesit në Lojërat Olimpike dimërore kanë mbaruar brenda një kohe rekord prej vetëm tre ditësh.

“Furnizimet mbaruan për vetëm tre ditë,” tha një atlet anonim për gazetën italiane. “Na premtuan se do të vijnë të tjera, por kush e di kur.”

Gazeta fajësoi organizatorët olimpikë, duke thënë se nuk kishin qenë “veçanërisht bujarë me numrat”. 

“Në Lojërat e Parisit atletët morën 300,000 prezervativë – dy në ditë për secilin – por numrat për këto Lojëra Dimërore ishin dukshëm më të ulët: as 10,000,” thuhet në raport.

Pak më pak se 3,000 atletë po garojnë në Lojërat Dimërore, krahasuar me rreth 10,500 në Lojërat e Parisit dy vite më parë.

Javën e kaluar, guvernatori i rajonit të Lombardisë, Attilio Fontana këmbënguli se kjo temë nuk duhet të jetë arsye për siklet. “Po, ne u ofrojmë prezervativë falas atletëve në fshatin olimpik,” tha ai në një postim në rrjetet sociale. “Nëse kjo u duket e çuditshme disa njerëzve, ata nuk e dinë praktikën e vendosur olimpike. Ajo filloi në Seul 1988 për të rritur ndërgjegjësimin te atletët dhe të rinjtë për parandalimin e sëmundjeve seksualisht të transmetueshme - një temë që nuk duhet të shkaktojë siklet.”

Fontana ndau gjithashtu një postim në Instagram nga patinatorja spanjolle Olivia Smart, ku ajo u tregonte ndjekësve prezervativë me logon e verdhë të Rajonit Lombardy. “I gjeta,” thotë ajo në videon që u bë virale. “Kanë gjithçka që të duhet.”

Ka shumë aktivitete të tjera për t’i mbajtur atletët të zënë në fshatin olimpik, përfshirë një palestër të madhe, lojëra tavoline si futbolli i tavolinës dhe air hockey, madje edhe një piano. Ka gjithashtu makina pijesh falas, të mbushura me Coca Cola dhe smoothie nga Innocent./GazetaExpress/