Federata Shqiptare e Futbollit (FSHF) ka njoftuar se të hënën do të hapë procesin e aplikimit për tifozët shqiptarë që dëshirojnë të blejnë bileta për ndeshjen Poloni – Shqipëri.

Kjo ndeshje është e vlefshme për “play-offin” e Botërorit 2026, që do të zhvillohet më 26 mars në Varshavë, shkruan “Gazeta Express”.

“Për shkak të numrit të kufizuar të biletave në dispozicion për tifozët kuqezi, përzgjedhja do të bëhet përmes një shorti elektronik, i cili do të realizohet përmes platformës t-Ticket. Të gjithë tifozët që dëshirojnë të aplikojnë duhet të regjistrohen paraprakisht në platformë duke krijuar një llogari personale ose duke përdorur një llogari ekzistuese”, njofton fillimisht FSHF-ja nw sajtin e saj zyrtar.

“Çdo aplikant do të ketë mundësi të aplikojë vetëm për dy bileta, pa mundësi për të kërkuar më pak apo më shumë. Procesi i aplikimit do të jetë i hapur për një periudhë 48 orë. Pas përfundimit të kësaj periudhe, sistemi do të përzgjedhë në mënyrë rastësore aplikantët fitues. Aplikantët e përzgjedhur do të njoftohen përmes email-it, ku do të marrin një link të personalizuar për të përfunduar pagesën e biletave. Pagesa duhet të kryhet brenda 24 orëve nga momenti i marrjes së njoftimit.Pas përfundimit të pagesës, tifozët fitues do të marrin një link përkatës për të aksesuar biletat e tyre. Biletat do të jenë të disponueshme për shkarkim në aplikacionin zyrtar ‘Mobilny System Biletowy’”, mbyllet njoftimi i FSHF-së.

Në rast fitoreje në ndeshjen ndaj Polonisë, Shqipëria do të luante sërish në udhëtim – në finalen e “play-offit” – ndaj fituesit të ndeshjes Ukrainë – Suedi./GazetaExpress/