Sipas raporteve nga Turqia, Galatasaray ka vendosur të mos ndjekë më transferimin e portierit të Interit, Yann Sommer, pas zbulimit të kërkesave të tij të larta financiare.

Emri i portierit veteran zviceran ishte përmendur si një nga objektivat e klubit turk për merkaton e verës. U zhvilluan bisedime fillestare dhe kontakte me përfaqësuesit e lojtarit, por duket se përgjigjet e marra nuk ishin në përputhje me pritshmëritë e Galatasarayt.

Sipas gazetës turke Fanatik, drejtori sportiv Abdullah Kavukcu është informuar nga përfaqësuesit e Sommer se lojtari kërkon një kontratë dyvjeçare me një pagë prej 7-8 milionë euro në sezon – shifër që është shumë më e lartë se oferta maksimale prej 3 milionë euro në sezon që Galatasaray kishte në plan.

Përveç pagës së lartë, një tjetër pengesë është vetë Interi, i cili është i gatshëm ta shesë portierin, por jo për shumën prej 1-2 milionë euro që ofron Galatasaray. Kjo e bën marrëveshjen pothuajse të pamundur dhe Sommer pritet të hiqet nga lista e dëshirave të klubit turk për këtë verë.

Ndërkohë, Galatasaray është i interesuar edhe për mesfushorin Hakan Çalhanoğlu, por edhe në këtë rast, është e vështirë që klubi turk të përmbushë kërkesën e Interit prej 30 milionë euro për lojtarin./GazetaExpress/